పంజాబ్‌లో ఆమ్‌ఆద్మీ పార్టీ అఖండ విజయం

• ఆప్‌కా పంజాబ్‌
• యూపీ, ఉత్తరాఖండ్‌, గోవా, మణిపూర్‌లో బీజేపీ

రసవత్తరంగా సాగిన ఐదు రాష్ర్టాల అసెంబ్లీ ఎన్నికల ఫలితాలు గురువారం వెల్లడయ్యాయి. పంజాబ్‌లో ఆమ్‌ఆద్మీ పార్టీ అఖండ విజయాన్ని సాధించింది. మొత్తం 117 స్థానాల్లో 92 సీట్లను గెలుచుకొన్నది. కాంగ్రెస్‌ 18 సీట్లకు పరిమితమైంది. ఉత్తరప్రదేశ్‌లో బీజేపీ వరుసగా రెండోసారి అధికారంలోకి వచ్చింది. మొత్తం 403 అసెంబ్లీ స్థానాలకు గాను 273 చోట్ల బీజేపీ కూటమి విజయం సాధించింది. అఖిలేశ్‌ నేతృత్వంలోని సమాజ్‌వాదీ పార్టీ (ఎస్పీ) కూటమి ఈ ఎన్నికల్లో గణనీయంగా పుంజుకొన్నా.. అధికారానికి చేరువ కాలేకపోయింది. ఎస్పీ సొంతంగా 111 స్థానాలను కైవసం చేసుకొన్నది. 1996 తర్వాత యూపీలో ప్రతిపక్ష పార్టీకి వందకు పైగా సీట్లు రావడం ఇదే తొలిసారి. ఈ ఎన్నికల్లో బీఎస్పీ, కాంగ్రెస్‌ తుడిచిపెట్టుకుపోయాయి. ఉత్తరాఖండ్‌లో 47, మణిపూర్‌లో 32 సీట్లను గెలుచుకొని ప్రభుత్వ ఏర్పాటుకు కావాల్సిన మెజారిటీని బీజేపీ సాధించింది. గోవాలోని 40 సీట్లలో 20 స్థానాల్లో గెలిచిన కమలదళం.. మెజారిటీ మార్కుకు ఒక్క సీటు దూరంలో నిలిచిపోయింది.

భగత్‌సింగ్‌ ఊరిలో భగవంత్‌ ప్రమాణం

1. ఆప్‌ నేత భగవంత్‌ మాన్‌.. భగత్‌సింగ్‌ పూర్వీకుల గ్రామం ఖాట్కర్‌కలాన్‌లో సీఎంగా ప్రమాణం చేయనున్నారు. భగవంత్‌ మాన్‌ కమెడియన్‌గా కెరీర్‌ ప్రారంభించారు. ‘జుగ్ను మస్త్‌ మస్త్‌’ టీవీ షోతో పాపులారిటీ సంపాదించారు.
2. సీఎం చన్నీ బదౌర్‌లో ఆప్‌ అభ్యర్థి, మొబైల్‌ మెకానిక్‌ లాబ్‌సింగ్‌ చేతిలో ఓడిపోయారు. అమృత్‌సర్‌ ఈస్ట్‌ నుంచి పోటీచేసిన కాంగ్రెస్‌ నేత సిద్దూ.. ఆప్‌ నేత, ఆరోగ్య కార్యకర్త జీవన్‌జ్యోత్‌ కౌర్‌ చేతిలో ఓటమి చెందారు.
3. రైతు ఉద్యమం దేశాన్నంతటినీ కదలించింది. కానీ, పంజాబ్‌ ఎన్నికల్లో రైతుల తరఫున బరిలో నిలిచిన సంయుక్త సమాజ్‌ మోర్చా ఏ మాత్రం ప్రభావం చూపలేకపోయింది.
4. సోనూసూద్‌ సోదరి మాళవికాసూద్‌ ఓడిపోయారు. కాంగ్రెస్‌ తరఫున పోటీచేసిన ఆమె.. మోగాలో ఆప్‌ అభ్యర్థి అమన్‌దీప్‌ కౌర్‌ చేతిలో ఓటమి పాలయ్యారు.

గోవా

• గోవాలో ఇద్దరు డిప్యూటీ సీఎంలు ఓటమిపాలయ్యారు. మనోహర్‌ అజ్‌కావంకర్‌ కాంగ్రెస్‌ అభ్యర్థి దిగంబర్‌ కామత్‌ చేతిలో ఓడిపోయారు. మరో డిప్యూటీ సీఎం చంద్రకాంత్‌ కవలేకర్‌ కూడా కాంగ్రెస్‌ అభ్యర్థి అల్టోన్‌ డీ కోస్టా చేతిలో పరాజయం పొందారు.
  అసెంబ్లీలోకి మూడు జంటలు
• ఈసారి గోవా అసెంబ్లీలోకి మూడు జంటలు అడుగుపెట్టబోతున్నాయి. ఆరోగ్య శాఖ మంత్రి విశ్వజిత్‌ రాణే, ఆయన భార్య దివ్య బీజేపీ టికెట్‌పై గెలుపొందారు. అలాగే మైఖేల్‌ లోబో, ఆయన భార్య డెలీలా కాంగ్రెస్‌ తరఫున గెలిచారు. అటనాసియో మోన్సరేట్‌, ఆయన భార్య జెన్నీఫర్‌ బీజేపీ టికెట్‌పై విజయం సాధించారు.
  ఓడిన ఉత్పల్‌ పారికర్‌
• మనోహర్‌ పారికర్‌ కుమారుడు ఉత్పల్‌ ఓటమి పాలయ్యారు. పనాజీ టికెట్‌ ఇచ్చేందుకు బీజేపీ నిరాకరించడంతో ఆయన స్వతంత్ర అభ్యర్థిగా పోటీ చేశారు.

ఉత్తరాఖండ్‌

• 22 ఏండ్ల ఉత్తరాఖండ్‌ రాష్ట్ర చరిత్రలో సిట్టింగ్‌ ముఖ్యమంత్రులెవరూ తదుపరి అసెంబ్లీ ఎన్నికల్లో గెలవలేదు. అదే ట్రెండ్‌ ఇప్పుడు కూడా రిపీట్‌ అయింది. ఉత్తరాఖండ్‌ సీఎం పుష్కర్‌ సింగ్‌ ధామీ కాంగ్రెస్‌ అభ్యర్థి చేతిలో ఓటమి పాలయ్యారు.
• మాజీ సీఎం, కాంగ్రెస్‌ సీనియర్‌ నేత హరీశ్‌ రావత్‌ పరాజయం పాలయ్యారు. లాల్‌కువా స్థానం నుంచి పోటీ చేసిన ఆయన.. బీజేపీ అభ్యర్థి మోహన్‌ సింగ్‌ బిస్త్‌ చేతిలో ఓటమి చెందారు.

యూపీ

• ఎస్పీ అధినేత అఖిలేశ్‌ యాదవ్‌.. కర్హల్‌ నియోజక వర్గం నుంచి బీజేపీ అభ్యర్థి, కేంద్రమంత్రి ఎస్పీ సింగ్‌ బఘేల్‌పై 61 వేల ఓట్ల మెజార్టీతో విజయం సాధించారు.
• యూపీ డిప్యూటీ సీఎం కేశవ్‌ ప్రసాద్‌ మౌర్య ఓటమి పాలయ్యారు. ఎస్పీ అభ్యర్థి పల్లవి పటేల్‌ చేతిలో 7337 ఓట్ల తేడాతో ఓడిపోయారు.
• ఎన్నికలకు ముందు బీజేపీ నుంచి ఎస్పీలో చేరిన మాజీ మంత్రి స్వామి ప్రసాద్‌ మౌర్య బీజేపీ అభ్యర్థి సురేంద్ర కుమార్‌ కుష్వాహా చేతిలో సుమారు 45వేల ఓట్ల తేడాతో ఓటమి
  చెందారు.

ఇద్దరు సీఎంలు పరాజయం

పంజాబ్‌ సీఎం చరణ్‌జీత్‌ సింగ్‌ చన్నీ, ఉత్తరాఖండ్‌ సీఎం పుష్కర్‌ సింగ్‌ ధామీ అసెంబ్లీ ఎన్నికల్లో ఓడిపోయారు. పంజాబ్‌ మాజీ ముఖ్యమంత్రులు అమరిందర్‌ సింగ్‌, ప్రకాశ్‌ సింగ్‌ బాదల్‌, ఉత్తరాఖండ్‌ సీఎం హరీశ్‌ రావత్‌ కూడా ఓటమి పాలయ్యారు. చన్నీ తాను పోటీ చేసిన రెండు స్థానాల్లోనూ మట్టికరవడం గమనార్హం. ఉత్తరాఖండ్‌లో ధామీ ఓడిపోయినప్పటికి బీజేపీ అధికారాన్ని నిలుపుకొన్నది. శిరోమణి అకాలీదళ్‌చీఫ్‌ సుఖ్‌బీర్‌ సింగ్‌ బాదల్‌ ఆప్‌ అభ్యర్థి చేతిలో ఓడిపోయారు. గోవా మాజీ సీఎం, తృణమూల్‌ అభ్యర్థి చర్చిల్‌ అలేమావ్‌ కూడా ఆప్‌ అభ్యర్థి చేతిలో ఓటమి పాలయ్యారు.