నేటి నుంచి శ్రీవారి ఆలయంలో సాలకట్ల వసంతోత్సవాలు

సాలకట్ల వసంతోత్సవాలు | తిరుమల వేంకటేశ్వరస్వామి సన్నిధిలో నేటి నుంచి మూడు రోజుల పాటు సాలకట్ల వసంతోత్సవాలు జరుగనున్నాయి. కొవిడ్‌-19 నిబంధనలు పాటిస్తూ ఉత్సవాలను ఆలయంలో ఏకాంతంగా నిర్వహించనుండగా.. ఉత్సవాల్లో భాగంగా రేపు జరగాల్సిన స్వర్ణ రథోత్సవాన్ని టీటీడీ రద్దు చేసింది.

తిరుమల : తిరుమల వేంకటేశ్వరస్వామి సన్నిధిలో నేటి నుంచి మూడు రోజుల పాటు సాలకట్ల వసంతోత్సవాలు జరుగనున్నాయి. కొవిడ్‌-19 నిబంధనలు పాటిస్తూ ఉత్సవాలను ఆలయంలో ఏకాంతంగా నిర్వహించనుండగా.. ఉత్సవాల్లో భాగంగా రేపు జరగాల్సిన స్వర్ణ రథోత్సవాన్ని టీటీడీ రద్దు చేసింది. వసంత రుతువులో శ్రీ మలయప్పస్వామివారికి జరిగే ఈ ఉత్సవానికి ‘వసంతోత్సవ’మని పేరు ఏర్పడింది. ఈ క్రతువులో సుగంధ పుష్పాలను స్వామికి సమర్పించటమే కాక వివిధ ఫలాలను స్వామికి నివేదించనున్నారు.

ప్రతి సంవత్సరం చైత్రశుద్ధ పౌర్ణమికి ముగిసేటట్లుగా ఉత్సవాలు మూడు రోజుల పాటు జరుపడం ఆనవాయితీగా వస్తోంది. ఉత్సవాల్లో భాగంగా మూడు రోజుల పాటు మధ్యాహ్నం 2 నుంచి 4 గంటల వరకు శ్రీ‌వారి ఆల‌యంలోని క‌ల్యాణ‌మండ‌పంలో స్వామి, అమ్మవార్ల ఉత్సవర్లకు స్నపనతిరుమంజనం నిర్వహించనున్నారు. పాలు, పెరుగు, తేనె, కొబ్బరినీళ్ళు, పసుపు, చందనంతో అభిషేకం చేస్తారు. సాయంత్రం 6 నుంచి 7 గంటల వరకు ఆస్థానం, రాత్రి 7 గంట‌ల‌కు స్వామి, అమ్మవార్లలను ఆల‌య నాలుగు మాడ వీధుల్లో ఊరేగింపు నిర్వహిస్తారు.

మొద‌టి రెండు రోజులు శ్రీదేవి భూదేవి సమేత శ్రీ మలయప్ప స్వామివారికి, మూడో రోజు శ్రీదేవి, భూదేవి సమేత శ్రీ మలయప్పస్వామివారితో పాటు శ్రీ సీతారామలక్ష్మణ ఆంజనేయస్వామి ఉత్సవర్లు, రుక్మిణి సమేత శ్రీకృష్ణస్వామి ఉత్సవమూర్తులకు స్నపన తిరుమంజనం, ఊరేగింపు నిర్వహించనున్నారు. ఈ ఉత్సవాల కారణంగా మూడు రోజుల పాటు కల్యాణం, ఊంజ‌ల్‌సేవ‌, బ్రహ్మోత్సవం, సహస్రదీపాలంకరణ సేవలను టీటీడీ రద్దు చేసింది.

ఇవికూడా చదవండి..

దేశంలో గుజరాత్‌ ఒక్కటే ఉందా?

ఆ చిన్నారిని కాపాడిన రైల్వే హీరోకు గిఫ్ట్‌గా ఖ‌రీదైన బైక్

ఆక్సిజన్‌ను పెంచే వ్యాయామం

అమెరికన్లే మాకు ముఖ్యం!

డబుల్‌, ట్రిపుల్‌ మ్యుటెంట్ల మధ్య తేడా లేదు

మూడు ప్రభుత్వ ఉద్యోగాలు గెలిచి..

సొంత వైద్యం మానుకో!

జాన్సన్‌ అండ్‌ జాన్సన్‌ వ్యాక్సిన్‌ వినియోగానికి సీడీసీ అనుమతి

ఈ-ప్రాపర్టీ కార్డులు పంపిణీకి నేడు ప్రధాని శ్రీకారం