Saudi Arabia | సౌదీలో బంగ్లాదేశీ జంట మరణశిక్ష వీడియో వైరల్.. అసలు నిజమిదే!

Saudi Arabia | సౌదీ అరేబియాలోని మక్కాలో బంగ్లాదేశీ జంటకు ఉరిశిక్ష విధించారన్న వార్త ఇటీవల సంచలనంగా మారింది. ఈ క్రమంలోనే సౌదీ అరేబియాలో బురఖా ధరించిన మహిళ శిరచ్ఛేదనం చేస్తున్న వీడియో నెట్టింట వైరల్‌గా మారింది.

Saudi Arabia | సౌదీ అరేబియాలోని మక్కాలో బంగ్లాదేశీ జంటకు ఉరిశిక్ష విధించారన్న వార్త ఇటీవల సంచలనంగా మారింది. మక్కా మసీదు లోపల అసభ్యకరమైన చర్యలకు పాల్పడ్డారనే ఆరోపణలతో వారికి మరణదండన విధించారని పలు కథనాలు బయటకొచ్చాయి. ఈ క్రమంలోనే సౌదీ అరేబియాలో బురఖా ధరించిన మహిళ శిరచ్ఛేదనం చేస్తున్న వీడియో నెట్టింట వైరల్‌గా మారింది. బంగ్లాదేశీ జంటకు ఉరిశిక్ష విధిస్తున్నప్పుడు తీసిన వీడియో ఇదే అంటూ ప్రచారం జరుగుతోంది. ఈ క్రమంలో ఓ జాతీయ మీడియా దీనిపై ఫ్యాక్ట్ చెక్‌ చేసి కీలక విషయాలు వెల్లడించింది.

అసలు వీడియో ఎప్పటిది?

సౌదీ అరేబియాలోని మక్కాలో అక్టోబర్ 14న నజ్రుల్ ఇస్లాం, స్వీటీ అక్తర్ అనే ఇద్దరు బంగ్లాదేశీయులకు మరణశిక్ష అమలు చేసినట్లు వార్తలు వచ్చాయి. మసీదు లోపల అసభ్యకరమైన చర్యకు పాల్పడ్డారనే ఆరోపణల నేపథ్యంలో వారికి శిక్ష విధించినట్లు కథనాలు పేర్కొన్నాయి. ఈ క్రమంలోనే ఓ మహిళను శిరచ్ఛేదం చేస్తున్న వీడియోను సోషల్ మీడియాలో షేర్ చేస్తూ.. ఇదే ఆ ఇద్దరికి విధించిన శిక్షకు సంబంధించిన దృశ్యాలంటూ ప్రచారం చేశారు. అయితే, ఈ వీడియోపై ఇండియా టుడే ఫ్యాక్ట్ చెక్ పరిశీలన చేపట్టింది. వీడియోలోని దృశ్యాలను రివర్స్ సెర్చ్ చేయగా.. 2015 జనవరి 23న ప్రచురితమైన డైలీ మెయిల్ కథనం వెలుగులోకి వచ్చింది. అందులో ఈ వీడియో మయన్మార్‌కు చెందిన లైలా బింట్ అబ్దుల్ ముతలేబ్ బాసిమ్ అనే మహిళకు విధించిన మరణశిక్షకు సంబంధించినదిగా పేర్కొన్నారు.

మహిళకు ఎందుకు మరణశిక్ష విధించారు?

అప్పటి కథనాల ప్రకారం.. తన సవతి కుమార్తెపై అత్యాచారానికి పాల్పడి, అనంతరం ఆమెను హత్య చేయించిన కేసులో ఆ మహిళ దోషిగా తేలింది. ఈ ఘటనకు సంబంధించిన శిక్ష అమలు దృశ్యాలు అప్పట్లోనే అంతర్జాతీయంగా తీవ్ర చర్చకు దారితీశాయి. శిక్ష అమలును చిత్రీకరించిన వ్యక్తిని సౌదీ అధికారులు తరువాత అరెస్టు చేసినట్లు వార్తలు వచ్చాయి. దీంతో ప్రస్తుతం సోషల్ మీడియాలో ప్రచారంలో ఉన్న వీడియోకు 2026లో బంగ్లాదేశీయులకు విధించిన మరణశిక్షతో సంబంధం లేదని స్పష్టమవుతోంది.

తమ పౌరుల మరణశిక్షపై బంగ్లాదేశ్ ఆందోళన

మక్కాలో తమ దేశ పౌరులకు మరణశిక్ష అమలు చేసిన విషయాన్ని సౌదీ అరేబియా ముందుగా తమకు తెలియజేయలేదని బంగ్లాదేశ్ తెలిపినట్లు నివేదికలు పేర్కొన్నాయి. సౌదీ అరేబియాలో నివసిస్తూ, పనిచేస్తున్న 30 లక్షలకు పైగా బంగ్లాదేశీయుల నేపథ్యంలో ఈ ఘటన ప్రాధాన్యం సంతరించుకుంది. సౌదీ అంతర్గత వ్యవహారాల మంత్రిత్వ శాఖ ప్రకారం.. నేర తీవ్రతతో పాటు మసీదు పవిత్రతను ఉల్లంఘించిన అంశాలను పరిగణనలోకి తీసుకొని ఇద్దరికి మరణశిక్ష విధించినట్లు సమాచారం. అయితే, వారు చేసిన నేరానికి సంబంధించిన పూర్తి వివరాలు, శిక్ష అమలు చేసిన విధానం గురించి వార్తలు వెలువడిన సమయంలో స్పష్టత లేదు.

సౌదీలో మరణశిక్షలపై ఆందోళనలు

సౌదీ అరేబియాలో మరణశిక్షల అమలుపై అంతర్జాతీయంగా ఆందోళనలు వ్యక్తమవుతున్నాయి. అమ్నెస్టీ ఇంటర్నేషనల్ నివేదిక ప్రకారం.. 2025లో ప్రపంచవ్యాప్తంగా 17 దేశాల్లో కనీసం 2,707 మరణశిక్షలు అమలయ్యాయి. ఇది 2024తో పోలిస్తే 78 శాతం ఎక్కువ. సౌదీ అరేబియాలోనూ పెద్ద సంఖ్యలో మరణశిక్షలు అమలైనట్లు నివేదికలు వెల్లడించాయి. అసోసియేటెడ్ ప్రెస్ అక్టోబర్ 19న ప్రచురించిన కథనం ప్రకారం.. ఆ ఏడాదిలో అప్పటివరకు సౌదీ అరేబియాలో 170 మందికి పైగా మరణశిక్షలు అమలయ్యాయి.