దక్షిణాది వారికే ఛాన్స్‌ ఇవ్వాలి

దక్షిణాది సినిమాల్లో ఉత్తరాది హీరోయిన్లకు ఎక్కువ అవకాశాలు రావడం వెనక వారి చర్మవర్ణమే కారణమని బాలీవుడ్‌ నటి రాధికా ఆప్టే అభిప్రాయపడింది.

దక్షిణాది సినిమాల్లో ఉత్తరాది హీరోయిన్లకు ఎక్కువ అవకాశాలు రావడం వెనక వారి చర్మవర్ణమే కారణమని బాలీవుడ్‌ నటి రాధికా ఆప్టే అభిప్రాయపడింది. దక్షిణాది తారలు అందంతో పాటు అద్భుతమైన ప్రతిభాపాటవాలతో ఉంటారని, వారిని కాదని ఉత్తరాది వారిని ఎందుకు ఎంపిక చేసుకుంటున్నారని ప్రశ్నించింది. తాజా ఇంటర్వ్యూలో ఆమె ఈ వ్యాఖ్యలు చేసింది. అయితే తన అభిప్రాయం పూర్తిగా నిజం కాకపోవచ్చునని ఆమె పేర్కొన్నది.

‘నార్త్‌ హీరోయిన్లు బాగా తెల్లగా ఉంటారనే కారణంతో దక్షిణాదిలో ఎక్కువ అవకాశాలు వస్తాయని అనిపించేది. నా కలర్‌ కొంచెం నలుపు. అందుకే సౌత్‌లో ఎక్కువ అవకాశాలు రాలేదేమో. అయితే ఈ విషయంలో వివాదం సృష్టించడం నా ఉద్దేశ్యం కాదు. దక్షిణాది హీరోయిన్లు అద్భుతమైన ప్రతిభావంతులు. అన్ని భాషలను మాట్లాడగలుగుతారు. ముంబయి నుంచి నటీనటులను తీసుకొచ్చి వారి పాత్రలకు డబ్బింగ్‌ చెప్పించడం కంటే దక్షిణాది వారికే అవకాశాలు ఇవ్వడం మంచిదన్నది నా అభిప్రాయం’ అని రాధికా ఆప్టే చెప్పింది. భాష రాకపోతే పాత్రకు ఏమాత్రం న్యాయం చేయలేమని ఆమె అభిప్రాయపడింది.