పుతిన్‌కు వ్యాక్సిన్‌.. ఫొటో విడుదల చేయకపోవడంపై అనుమానాలు

మాస్కో: రష్యా అధ్యక్షుడు వ్లాదిమిర్ పుతిన్‌కు మంగళవారం కరోనా వైరస్‌ టీకాలు వేశారు. అయితే ఈ సమయంలో వీడియో లేదా ఫొటోలను అక్కడి ప్రభుత్వం విడుదల చేయలేదు.

March 25, 2021 / 02:07 PM IST

పుతిన్‌కు వ్యాక్సిన్‌.. ఫొటో విడుదల చేయకపోవడంపై అనుమానాలు

మాస్కో: రష్యా అధ్యక్షుడు వ్లాదిమిర్ పుతిన్‌కు మంగళవారం కరోనా వైరస్‌ టీకాలు వేశారు. అయితే ఈ సమయంలో వీడియో లేదా ఫొటోలను అక్కడి ప్రభుత్వం విడుదల చేయలేదు. ప్రభుత్వం కేవలం ఒక ప్రకటన విడుదల చేసి పుతిన్‌ వ్యాక్సిన్‌ తీసుకున్నారు అని సమాచారం ఇచ్చింది. ఇంతకు ఆయనకు ఏ టీకా వేశారు. రష్యా ప్రభుత్వం అనుమతించిందేనా? ఏ కంపెనీ తయారుచేసింది పుతిన్‌కు వేశారు? అనే అనుమానాలు తలెత్తుతున్నాయి.

‘టీకా తీసుకున్న తరువాత అధ్యక్షుడి ఆరోగ్యం బాగానే ఉన్నది. టీకా తర్వాత రోజంతా అలసట లేకుండా పని చేశారు. పుతిన్‌కు నచ్చనందున టీకా తీసుకుంటున్న ఫొటో లేదా వీడియో విడుదల చేయలేదు’ అని క్రెమ్లిన్ ప్రతినిధి డిమిత్రి పెస్కోవ్ స్పష్టం చేశారు.

కెమెరా ముందు వ్యాక్సిన్ తీసుకోవడానికి అధ్యక్షుడు అనుమతించలేదని, ఇలా ఫొటోలకు ఫోజులివ్వడం ఆయనకు నచ్చదని జర్నలిస్టులు అడిగిన ప్రశ్నలకు సమాధానంగా పెస్కోవ్‌ చెప్పారు. కరోనా వైరస్‌కు వ్యతిరేకంగా వ్యాక్సిన్ తీసుకోవడం ద్వారా అధ్యక్షుడు పుతిన్.. రష్యా ప్రజలకు మంచి ఉదాహరణగా నిలిచారన్నారు. మూడు వారాల తరువాత ఆయనకు రెండవ మోతాదు వ్యాక్సిన్ ఇస్తామని పెస్కోవ్‌ చెప్పారు.

ఈ సంవత్సరం ప్రారంభంలో రష్యా ప్రజల డిమాండ్‌ను తీర్చడానికి తగిన వ్యాక్సిన్ లేదని, అయితే ఇప్పుడు ఉత్పత్తి సామర్థ్యం పెరిగిందని ఆయన వెల్లడించారు. రష్యాలో వ్యాక్సిన్ డిమాండ్ నిరంతరం పెరుగుతున్నదని ఆయన అన్నారు. అధ్యక్షుడికి టీకాలు వేసిన తరువాత వ్యాక్సిన్లకు డిమాండ్ మరింత తీవ్రమవుతుందని భావిస్తున్నట్లు పెస్కోవ్‌ పేర్కొన్నారు.

టీకాలు తీసుకోవాలనుకునే నిర్ణయం పూర్తిగా రష్యన్‌ ప్రజలకు స్వచ్ఛందంగా ఉన్నదని పుతిన్ సోమవారం తెలిపారు. ఇప్పటివరకు రష్యాలో 4.3 మిలియన్ ప్రజలకు రెండు మోతాదుల టీకా ఇచ్చారు. రష్యాలో జనాభా 144 మిలియన్లు. రష్యాలో కరోనా అత్యంత ప్రాచుర్యం పొందిన వ్యాక్సిన్ స్పుత్నిక్ వీ. అలాగే, ఎపివాకోరోనా, కోవివాక్ అనే మరో రెండు వ్యాక్సిన్లకు పుతిన్‌ ప్రభుత్వం అత్యవసర అనుమతి ఇచ్చింది.