పొడవాటి జుట్టున్న పాకిస్తాన్ కళాకారుడు అరెస్ట్‌

పాకిస్తాన్‌కు చెందిన క‌ళాకారుడు అబూజర్ మధును ఇటీవల లాహోర్ పోలీసులు అదుపులోకి తీసుకున్నారు. తెల్లవారుజామున రిక్షా కోసం ఎదురుచూస్తుండ‌గా అబూజ‌ర్‌ను స్టేషన్‌కు తీసుకెళ్లి విచారించారు

June 13, 2021 / 10:55 PM IST

పొడవాటి జుట్టున్న పాకిస్తాన్ కళాకారుడు అరెస్ట్‌

లాహోర్: పాకిస్తాన్‌కు చెందిన క‌ళాకారుడు అబూజర్ మధును ఇటీవల లాహోర్ పోలీసులు అదుపులోకి తీసుకున్నారు. తెల్లవారుజామున రిక్షా కోసం ఎదురుచూస్తుండ‌గా అబూజ‌ర్‌ను స్టేషన్‌కు తీసుకెళ్లి విచారించారు. అయితే, ఆయ‌న డాక్యుమెంట్ల‌ను ప‌రిశీలించిన త‌ర్వాత ఆయ‌న క‌ళాకారుడ‌నే విష‌యం తెలుసుకుని వ‌దిలిపెట్టేశారు.

క‌ళాకారుడు అబూజ‌ర్ మ‌ధును అరెస్ట్ చేయ‌డం వెనుక కారణం ఏమిటని చాలా మంది ఆశ్చర్యపోయారు. అయితే, అతడి పొడవాటి జుట్టు అధికారులను ఇబ్బందుల్లో పడేసింది. రిక్షా కోసం ఎదురుచూస్తున్న అబూజ‌ర్ చూపులు అనుమానాస్ప‌దంగా ఉండ‌టంతో విచారించేందుకు పోలీస్‌స్టేషన్‌కు త‌ర‌లించారు. అతడి బ్యాగులు, వస్తువులు కూడా ప్రమాదకరమైన రీతిలో ఉండ‌టంతో పోలీసులు అనుమానించాల్సి వ‌చ్చింది. పోలీస్ స్టేష‌న్‌లో ఉన్న సెల్‌లో ఉన్న మధు ఫొటో సోష‌ల్ మీడియాలో వైరల్ అయింది. స్థానికుడైన‌ అలియా హైదర్ ఈ విష‌యాన్ని ట్విట్టర్‌లో పేర్కొన్నాడు. “ఆర్టిస్ట్, పెర్ఫార్మర్ అబూజర్ మధును రాత్రివేళ లాహోర్ వీధుల్లో నడుస్తున్నందున నిన్న రాత్రి అరెస్టు చేశారు. అతడిని అనుమానించారు. అతడి బ్యాగుల‌ను తనిఖీ చేశారు. పోలీస్ స్టేషన్‌కు తీసుకెళ్లి సెల్‌లో వేశారు అని ట్వీట్ చేయ‌డంతో విష‌యం గుప్పుమ‌న్న‌ది. పోలీసుల తీరును నెటిజెన్లు తీవ్రంగా విమ‌ర్శించారు.

తాము అరెస్ట్ చేసింది ఓ క‌ళాకారుడిన‌న్న విష‌యం గుర్తించిన పోలీసులు వెంట‌నే అత‌డ్ని విడిచిపెట్టారు. పొడ‌వాటి జుట్టుతో విచిత్ర వేష‌ధార‌ణ‌తో అనుమానాస్ప‌దంగా క‌నిపించ‌డంతో విచారించేందుకు పోలీస్ స్టేష‌న్‌కు తీసుకెళ్లామ‌ని, డాక్యుమెంట్లు ప‌రిశీలించి ఆయ‌న ఓ క‌ళాకారుడు అని తెలుసుకుని వ‌దిలిపెట్టిన‌ట్లు పోలీసులు తెలిపారు.