మురాసు తుఫాన్ ప్రభావం.. పెన్‌ప‌హాడ్ వ్యాప్తంగా నేలవాలిన వరి చేలు

మురాసు తుఫాన్ ప్రభావంతో వీచిన బలమైన గాలులకు పెన్‌ప‌హాడ్ మండల వ్యాప్తంగా వరి చేలు నేలకొరిగాయి. అర్నబ్‌ తుఫాన్‌ దెబ్బ నుండి కోలుకోకముందే ఇప్పుడు మరో తుఫాన్‌ మురాసు ప్రభావం వల్ల మంగళవారం కురిసిన వర్షం, గాలులకు చేతికొచ్చిన పంట పొలాలకు నేల వాలాయి.

పెన్‌ప‌హాడ్‌, నవంబర్ 03 : మురాసు తుఫాన్ ప్రభావంతో వీచిన బలమైన గాలులకు పెన్‌ప‌హాడ్ మండల వ్యాప్తంగా వరి చేలు నేలకొరిగాయి. అర్నబ్‌ తుఫాన్‌ దెబ్బ నుండి కోలుకోకముందే ఇప్పుడు మరో తుఫాన్‌ మురాసు ప్రభావం వల్ల మంగళవారం కురిసిన వర్షం, గాలులకు చేతికొచ్చిన పంట పొలాలకు నేల వాలాయి. అన్నదాతలు సాగునీటి కష్టాలు ఎదుర్కొని మండల వ్యాప్తంగా సుమారు 5 వేల ఎకరాలలో వరి పండించారు. ప్రస్తుతం పంట కోత దశకు వచ్చింది. ఈ దశలో వరుస తుఫాన్లు రైతులను కలవరపెడుతున్నాయి. అర్నబ్‌ తుఫాన్‌ ప్రభావంతో ఇటీవల కురిసిన వర్షాలకు లోతట్టు ప్రాంతాల్లో ఉన్న పంట పొలాలు ముంపునకు గురై దెబ్బతిన్నాయి. ఇప్పుడు మురాసు తుఫాన్ వచ్చి నిండా రైతులను ఆగం చేసినవి. పెన్‌ప‌హాడ్ గ్రామానికి చెందిన కౌలు రైతు బంటు కృష్ణ సాగు చేసిన 8 ఎకరాల వరి పంట గాలుల ధాటికి పూర్తిగా నేలవాలింది.

పంట చేతికొచ్చే సమయంలో ఈ ఘటన చోటుచేసుకోవడంతో రైతులు తీవ్ర ఆందోళనకు గురవుతున్నారు. ఇప్పటికే సాగు కోసం భారీగా పెట్టుబడులు పెట్టిన రైతులకు పంట నేలకొరగడంతో ఆర్థికంగా నష్టం వాటిల్లే పరిస్థితి ఏర్పడింది. కష్టపడి సాగు చేసిన పంట గాలుల ప్రభావంతో దెబ్బతినడంతో పెట్టుబడులు తిరిగి వస్తాయో లేదోనని రైతులు ఆవేదన వ్యక్తం చేస్తున్నారు. ఇప్పటికే కరువు మండలంగా ప్రకటించిన పెన్‌ప‌హాడ్ మండలంలో తుఫాన్ ప్రభావం రైతులను మరింత ఆందోళనకు గురిచేస్తోంది. ఒకవైపు కరువు పరిస్థితులు, మరోవైపు తుఫాన్ ప్రభావంతో పంటలు దెబ్బతినడం రైతులకు తీవ్ర భారంగా మారింది. సంబంధిత వ్యవసాయ శాఖ అధికారులు వెంటనే క్షేత్రస్థాయిలో పర్యటించి పంట నష్టాన్ని అంచనా వేసి నష్ట పరిహారం చెల్లించాలని రైతులు కోరుతున్నారు.