Vikarabad | అకాల వర్షం, వడగండ్ల వానలతో నష్టపోయిన వికారాబాద్ జిల్లా రైతాంగానికి తెలంగాణ ప్రభుత్వం నిలిచింది. మర్పల్లి, మోమిన్పేట మండలాల్లో నష్టపోయిన ఉద్యాన, వ్యవసాయ పంటలను సీఎం కేసీఆర్ ఆదేశాలతో మంత్రులు నిరంజన్రెడ్డి, సబితా ఇంద్రారెడ్డి, రైతుబంధు సమితి అధ్యక్షుడు, ఎమ్మెల్సీ పల్లా రాజేశ్వర్రెడ్డి సహా పలువురు ఉన్నతాధికారులు పర్యటించారు. మర్పల్లి, మోమిన్పేట మండలాల్లోని దెబ్బతిన్న మామిడి, ఉల్లిగడ్డ, బొప్పాయి వంటి ఉద్యాన పంటలు, మొక్కజొన్న వంటి వ్యవసాయ పంటలను పరిశీలించారు.
అకాల వర్షాలు వికారాబాద్ జిల్లాలో గురువారం మధ్యాహ్నం బీభత్సం సృష్టించాయి. మర్పల్లి, మోమిన్పేట మండలాల్లోని 13 గ్రామాల్లో వడగండ్ల వాన కురిసింది. ఏకధాటిగా అరగంట నుంచి గంట వరకు వడగండ్లు పడటంతో రోడ్లన్నీ జలమయమయ్యాయి. వడగండ్లు రోడ్ల మీద పడి విదేశాల్లోని మంచుప్రాంతాలను తలపించడంతో ప్రజలు వింతగా చూశారు. అయితే వడగండ్ల కారణంగా చాలా చోట్ల పంటలు పాడైపోయాయి. మోమిన్పేట మండల పరిదిలోని 400 ఎకరాల్లో కూరగాయ పంటలు, మొక్కజొన్న, గోధుమ, జొన్న పంటలు పూర్తిగా దెబ్బతిన్నాయని ఆవేదన వ్యక్తం చేస్తున్నారు. ఈ క్రమంలో నష్టపోయిన పంటలను మంత్రులు నిరంజన్ రెడ్డి, సబితా ఇంద్రారెడ్డితో కలిసి రైతుబంధు సమితి అధ్యక్షుడు, ఎమ్మెల్సీ పల్లా రాజేశ్వర్రెడ్డి పరిశీలించారు. నష్టపోయిన రైతులను పరామర్శించారు.