కేంద్రం మెడలు వంచి వడ్లు కొనిపిస్తాం..

• రైతులను కాపాడుకుంటాం..
• రాష్ట్రంలోనే అత్యధికంగా వరి పండించేది మెదక్‌ జిల్లానే
• మెదక్‌ ఎంపీ కొత్త ప్రభాకర్‌రెడ్డి

మెదక్‌, నవంబర్‌ 10: యాసంగి వడ్లను కొనుగోలు చేయకపోతే కేంద్రం మెడలు వంచైనా రైతులను కాపాడుకుంటామని మెదక్‌ ఎంపీ కొత్త ప్రభాకర్‌రెడ్డి అన్నారు. బుధవారం మెదక్‌ జిల్లా కేంద్రంలోని క్రిస్టల్‌ గార్డెన్స్‌లో మెదక్‌ మార్కెట్‌ కమిటీ నూతన వ్యవసాయ పాలకవర్గం అభినందన సభను ఏర్పాటు చేశారు. మెదక్‌ ఎమ్మెల్యే పద్మాదేవేందర్‌రెడ్డి అధ్యక్షతన నిర్వహించిన ఈ కార్యక్రమానికి ఆయన ముఖ్య అతిథిగా హాజరయ్యారు. ఈ సందర్భంగా ఎంపీ మాట్లాడుతూ ఆర్థికశాఖ మంత్రి తన్నీరు హరీశ్‌రావుకు వైద్య, ఆరోగ్యశాఖను అదనంగా అప్పగించినందుకు సీఎం కేసీఆర్‌కు ప్రత్యేక కృతజ్ఞతలు తెలిపారు. తెలంగాణలోని అన్ని జిల్లాల్లో కంటే మెదక్‌ జిల్లాలోనే వరి ఎక్కువగా పండుతున్నదని తెలిపారు. కాగా, యాసంగిలో పండించిన వడ్లను కొనుగోలు చేయకుండా కేంద్ర ప్రభుత్వం రైతులను ఇబ్బంది పెడుతున్నదన్నారు. రైతుల సంక్షేమానికి సీఎం కేసీఆర్‌ ఎన్నో సంక్షేమ పథకాలను ప్రవేశపెడుతున్నారని, రైతు పెట్టుబడి కోసం రైతుబంధు పథకాన్ని ప్రవేశపెట్టి ఎకరాకు రూ.5 వేల చొప్పున రెండు పంటలకు రూ.10 వేలు అందిస్తున్న ఘనత సీఎం కేసీఆర్‌దేనన్నారు. రాష్ట్రంలో ప్రాజెక్టులు నిర్మించి వాటి కింద ఉన్న భూముల సస్యశ్యామలం అయ్యేలా చేస్తున్న ఏకైక ప్రభుత్వం మనదేనన్నారు.

రైతులు బాగుంటేనే రాష్ట్రం బాగుంటుంది..

• ఎమ్మెల్యే పద్మాదేవేందర్‌రెడ్డి
  రైతులు బాటుంటేనే రాష్ట్రం బాగుంటుందని మెదక్‌ ఎమ్మెల్యే పద్మాదేవేందర్‌రెడ్డి అన్నారు. భారతదేశంలో ఏ రాష్ట్రంలో కూడా 24 గంటల కరెంటు ఇస్తున్నారా అని ప్రశ్నించారు. అదే తెలంగాణలో సీఎం కేసీఆర్‌ రైతులకు 24 గంటల విద్యుత్‌ను అందిస్తున్నారని గుర్తు చేశారు. పంట పెట్టుబడి నుంచి రైతు బీమా వరకు పథకాలు అందజేస్తున్న ఏకైక సీఎం కేసీఆర్‌ అని కొనియాడారు. కేంద్ర ప్రభుత్వం ధాన్యం కొనడంలో సహకరించడం లేదన్నారు. ఇందుకోసం ఈ నెల 12న పెద్ద ఎత్తున ధర్నాలు నిర్వహిస్తామన్నారు. నూతనంగా ఎన్నుకోవడిన వ్యవసాయ మార్కెట్‌ కమిటీ పాలకవర్గం రైతులకు ఎలాంటి ఇబ్బందులు లేకుండా చూడాలన్నారు.

రైతుల సంక్షేమమే సీఎం ధ్యేయం…

• ఎమ్మెల్సీ శేరి సుభాశ్‌రెడ్డి
  రైతుల సంక్షేమానికి సీఎం కేసీఆర్‌ ఎల్లవేళలా కృషి చేస్తున్నారని సీఎం రాజకీయ కార్యదర్శి, ఎమ్మెల్సీ శేరి సుభాశ్‌రెడ్డి అన్నారు. రైతుల సంక్షేమానికి ప్రతి క్షణం ముఖ్యమంత్రి ఆలోచన చేస్తుంటే, కేంద్ర ప్రభుత్వం వడ్లను కొనమనడం ఎంత వరకు సమంజసమన్నారు. 1985 నుంచి యువ నాయకులుగా పనిచేస్తున్న బట్టి జగపతి మెదక్‌ మార్కెట్‌ కమిటీ చైర్మన్‌గా ఎన్నిక కావడం సంతోషంగా ఉందన్నారు. రైతుల సంక్షేమానికి సహాయ, సహకారాలు అందిస్తానని అన్నారు.
  సీఎం కేసీఆర్‌ దయతోనే అందరికీ పదవులు..
• నర్సాపూర్‌ ఎమ్మెల్యే మదన్‌రెడ్డి
  సీఎం కేసీఆర్‌ దయతోనే అందరికీ పదవులు వస్తున్నాయని నర్సాపూర్‌ ఎమ్మెల్యే మదన్‌రెడ్డి అన్నారు. కష్టపడి పనిచేసే కార్యకర్తలకు టీఆర్‌ఎస్‌లో ఎప్పటికీ స్థానం ఉంటుందన్నారు. సీఎం కేసీఆర్‌ రైతుల కోసం ఎంతో కష్టపడుతున్నారని, యాసంగిలో కేంద్ర ప్రభుత్వం వడ్లను కొనకపోతే బీజేపీకి పుట్టగతులుండవని హెచ్చరించారు. అనంతరం మార్కెట్‌ కమిటీ చైర్మన్‌గా ఎన్నికైన బట్టి జగపతిని శాలువాలు, పూలమాలలతో ఘనంగా సన్మానించారు. సమావేశంలో జడ్పీ చైర్మన్‌ హేమలత, వైస్‌ చైర్మన్‌ లావణ్యరెడ్డి, డీసీసీబీ చైర్మన్‌ చిట్టి దేవేందర్‌రెడ్డి, వైస్‌ చైర్మన్‌ పట్నం మాణిక్యం, ఇఫ్కో డైరెక్టర్‌ దేవేందర్‌రెడ్డి, గ్రంథాలయ సంస్థ చైర్మన్‌ చంద్రాగౌడ్‌, రైతు సమన్వయ సమితి జిల్లా అధ్యక్షుడు సోములు, డీసీసీబీ డైరెక్టర్‌ బక్కి వెంకటయ్య, మున్సిపల్‌ చైర్మన్‌ చంద్రపాల్‌, వైస్‌ చైర్మన్‌ మల్లికార్జున్‌గౌడ్‌, జడ్పీటీసీలు, ఎంపీపీలు, మున్సిపల్‌ చైర్మన్లు, మార్కెట్‌ కమిటీ చైర్మన్లు, మార్కెట్‌ కమిటీ మాజీ చైర్మన్లు, డైరెక్టర్లు తదితరులు పాల్గొన్నారు.

నమ్మకాన్ని వమ్ము చేయను..

• బట్టి జగపతి మార్కెట్‌ కమిటీ చైర్మన్‌
  తనపై ఉంచిన నమ్మకాన్ని వమ్ము చేయనని మెదక్‌ మార్కెట్‌ కమిటీ చైర్మన్‌ బట్టి జగపతి అన్నారు. రైతుల సంక్షేమానికి ఎల్లప్పుడూ కృషి చేస్తానని చెప్పారు. సీఎం కేసీఆర్‌ నాయకత్వంలో పనిచేయడానికి సిద్ధంగా ఉన్నామన్నారు. మార్కెట్‌ కమిటీ పాలకవర్గం సహకారంతో మార్కెట్‌ కమిటీని మరింత అభివృద్ధి చేస్తానన్నారు.