న్యూఢిల్లీ, మార్చి 2: ఉద్యోగులకు శుభవార్త. ఈ ఏడాది జోరుగా ఇంక్రిమెంట్లు అందనున్నాయి. పెద్ద ఎత్తున జీతాలను పెంచాలని దేశీయ కంపెనీలు భావిస్తున్నాయి. సగటున 9.1 శాతం పెంపు ఉంటుందని అంచనా. కరోనాకు ముందు 2019లో ఇచ్చిన దానితో పోల్చితే ఇది ఎక్కువే కావడం గమనార్హం. వలసల నేపథ్యంలో ప్రతిభావంతులు చేజారకుండా కంపెనీల వ్యూహంలో భాగంగానే ఈ ఆకర్షణీయ ఇంక్రిమెంట్లు అని డెలాయిట్ టచ్ టోమట్సు ఇండియా (డీటీటీఐ) ఎల్ఎల్పీ నిర్వహించిన ‘2022 వర్క్ఫోర్స్ అండ్ ఇంక్రిమెంట్స్ ట్రెండ్స్ సర్వే’ చెప్తున్నది. గతేడాది కూడా ఉద్యోగుల జీతాలను 8 శాతం మేర కంపెనీలు పెంచాయి. ఈ క్రమంలోనే ఈసారి దానికంటే ఒక్క శాతం ఎక్కువే ఇంక్రిమెంట్ ఇవ్వాలని చూస్తున్నట్టు సర్వే అంటున్నది.
దేశీయ కార్పొరేట్ల ఆలోచనా ధోరణి ప్రతీ కరోనా వేవ్కు మారుతున్నది. 2020లో ఆర్థిక మందగమన పరిస్థితులు ఏర్పడిన నేపథ్యంలో తక్కువగా జీతాలు పెంచడం, వేతనాల్లో కోతలు పెట్టడం, నియామకాలను నిలిపివేయడం సాధారణంగా కనిపించింది. ఇక 2021లో జీతాల పెంపుండగా, వేతనాల్లో కోతలు ఆగిపోయాయి. పైగా కరోనా ప్రభావిత ప్రయోజనాలను ప్రవేశపెట్టారు. ఈ క్రమంలో ఈ ఏడాది నియామకాలు ఊపందుకుంటాయని, వలసలూ బాగానే ఉండొచ్చన్న సంకేతాలు స్పష్టంగా కనిపిస్తున్నాయి. దీంతో వలసల్ని నిరోధించేందుకు, ముఖ్యంగా నైపుణ్యం, ప్రతిభ కలిగినవారు వెళ్లిపోకుండా ఆయా సంస్థలు ఇంక్రిమెంట్ల బాట పడుతున్నాయని డీటీటీఐఎల్ఎల్పీ భాగస్వామి ఆనంద్రూప్ ఘోస్ తెలిపారు.
ఈసారి సర్వేలో పాల్గొన్న సంస్థల్లో 34 శాతం కంపెనీలు తమ ఉద్యోగులకు రెండంకెల స్థాయిలో జీతాలను పెంచాలని భావిస్తున్నాయి. 2021లో 20 శాతం, 2020లో 12 శాతంగానే ఈ తరహా సంస్థలున్నాయి. దీంతో ఈ ఏడాది మరింత మంది ఉద్యోగులకు భారీగా వేతనాలు పెరిగే అవకాశాలు కనిపిస్తున్నాయి. ఈ ఏడాది సర్వేలో దాదాపు 450 సంస్థలు పాల్గొన్నాయి. కాగా, గతంతో పోల్చితే ఈ ఏడాది అన్ని ప్రధాన రంగాల్లో జీతాల పెంపు భారీగానే ఉండొచ్చని సర్వే అభిప్రాయపడింది.
లైఫ్సైన్సెస్, ఐటీ రంగాల్లోనే ఎక్కువగా ఈ ఏడాది జీతాల పెంపు ఉంటుందని సర్వే చెప్తున్నది. ఫైనాన్షియల్ టెక్నాలజీ, ఐటీ ఉత్పాదక సంస్థలు, డిజిటల్/ఈ-కామర్స్ కంపెనీలు కూడా రెండంకెల స్థాయిలో తమ ఉద్యోగులకు వేతనాలను పెంచవచ్చని అంచనా. ఇక 92 శాతం సంస్థలు.. ఉద్యోగుల పనితీరు ఆధారంగానే ఇంక్రిమెంట్లు వేయనున్నాయని సర్వే స్పష్టం చేసింది. హోదాలనుబట్టి ఈ పెంపులు ఉండనున్నాయి. పదోన్నతుల విషయంలోనూ ఆయా సంస్థలు టాలెంట్కే ప్రాధాన్యత ఇవ్వనున్నాయి.