Visit:
K. Narayana | ‘ఎద్దు ఈనిందంటే మనఘాట్లో కట్టేయండి’ అన్నాడొక తెలివి తక్కువవాడు. ఆ తెలివితక్కువతనానికి ఇప్పటి ఎన్నికల సంఘం చర్యలకు తేడా ఉందా? అని సీపీఐ జాతీయ కార్యదర్శి కె.నారాయణ ఆగ్రహం వ్యక్తం చేశారు. ఓటర్ల జాబితా ప్రక్షాళన పేరుతో ఎన్నికల సంఘం చేస్తున్న వింత, వికృత చర్యలు ప్రజల్లో అనేక అనుమానాలు కలిగిస్తున్నాయని ఆయన పేర్కొన్నారు. ఓటర్ల వివరాల్లో సాంకేతిక తప్పులు ఉంటే వాటిని సరిచేయాలి. కానీ ఎల్.కె. అద్వానీ వంటి మాజీ ఉపప్రధాని, ఎస్. జైశంకర్ వంటి ప్రముఖులకు కూడా నోటీసులు ఇవ్వడం ఏ విధమైన ప్రక్షాళన? అని ప్రశ్నించారు.
పేర్లలో స్పెల్లింగ్ తేడాలు, వివాహం తర్వాత మహిళల ఇంటిపేరు మారడం వంటి సహజమైన మార్పులను కూడా సమస్యలుగా చూపించడం సమంజసమా? తాతముత్తాతల పుట్టిన తేదీలను వెతకడం మరీ విడ్డూరం కాదా?ఇది ఓటర్ల హక్కును కాపాడే ప్రక్రియగా ఉండాలి. వారి ఓటు హక్కును అవమానించే ప్రక్రియగా కాదన్నారు. కోట్లాది ఓటర్ల హక్కుల విషయంలో ఎన్నికల సంఘం అత్యంత పారదర్శకంగా, నిష్పక్షపాతంగా వ్యవహరించాలని సూచించాఉ. పీఎంవో కార్యాలయం ఆడించే ‘సురభి నాటకం’లో ఎన్నికల సంఘం అపవిత్ర పావుగా మారకూడదన్నారు.
