ఈ కథలో అందరూ గాయపడ్డ సింహాలే..

తొలి సినిమా ‘శివ’లోని తన పాత్ర పేరును ఇంటిపేరుగా మార్చుకున్నారు జేడీ చక్రవర్తి. మనీ, గులాబీ, అనగనగా ఒక రోజు, ఎగిరేపావురమా, ప్రేమకు వేళాయరా వంటి ఘన విజయాలను చవిచూసిన ఆయన.. బాలీవుడ్‌ క్లాసిక్‌ ‘సత్య’తో ఉత్తరాది ప్రేక్షకుల్ని సైతం మెప్పించారు.

తొలి సినిమా ‘శివ’లోని తన పాత్ర పేరును ఇంటిపేరుగా మార్చుకున్నారు జేడీ చక్రవర్తి. మనీ, గులాబీ, అనగనగా ఒక రోజు, ఎగిరేపావురమా, ప్రేమకు వేళాయరా వంటి ఘన విజయాలను చవిచూసిన ఆయన.. బాలీవుడ్‌ క్లాసిక్‌ ‘సత్య’తో ఉత్తరాది ప్రేక్షకుల్ని సైతం మెప్పించారు. ప్రస్తుతం ‘గాయపడ్డ సింహం’ చిత్రంతో ప్రతినాయకుడు ట్రబుల్‌ ధర్మాగా ప్రేక్షకుల ముందుకు రానున్నారు. తరుణ్‌భాస్కర్‌ హీరోగా నటించిన ఈ చిత్రానికి కశ్యప్‌ శ్రీనివాస్‌ దర్శకుడు. కల్యాణచక్రవర్తి మంథిన, భానుకిరణ్‌ ప్రతాప్‌, విజయ్‌కృష్ణ లింగమనేని, ఉమేష్‌ బన్సల్‌ నిర్మాతలు. మే 1న సినిమా విడుదల కానున్నది. ఈ సందర్భంగా గురువారం హైదరాబాద్‌లో విలేకరులతో మాట్లాడారు జేడీ చక్రవర్తి.

• నటుడిలోని ఉత్సాహాన్ని సవాలుతో కూడుకున్న పాత్రలు రెట్టిపు చేస్తాయి. ఎన్నో అద్భుతమైన పాత్రలు పోషించిన కమల్‌హాసన్‌కి కూడా దొరకని పాత్ర నాకు దొరికింది. ఇన్నాళ్లూ ఫస్ట్‌హాఫ్‌లో ఒకలా, సెకండాఫ్‌లో ఒకలా ప్రవర్తించే పాత్రల్ని చూశాం. కానీ ఈ పాత్ర ఆద్యంతం రెండు రకాలుగా ప్రవర్తిస్తుంది. అలా చేయడానికి కష్టపడ్డానని చెప్పను. కథలోని బలం, మ్యాజిక్‌ వల్ల అలా కుదిరింది.
• ఇందులో అందరూ గాయపడ్డ సింహాలే. అయితే ఎక్కువ గాయాలైన సింహం తరుణ్‌భాస్కర్‌. నాతోపాటు, మరో సింహానికి కూడా గాయాలయ్యాయి. ఆ సింహం ఎవరో త్వరలో రివీల్‌ చేస్తాం. ఈ కథ చాలా కొత్తగా ఉంటుంది. ఇందులో నా పాత్ర పేరు ట్రబుల్‌ ధర్మా, తరుణ్‌భాస్కర్‌ పేరు దరహాస్‌, ఇంకో చిత్రమైన పాత్ర ఉంటుంది. ఇవన్నీ కలిసే విధానం ఆసక్తికరంగా ఉంటుంది.
• దర్శకుడు కశ్యప్‌ మేకింగ్‌ ైస్టెల్‌ నాకు నచ్చింది. డిఫరెంట్‌గా, రియలిస్టిక్‌గా, హిలేరియస్‌గా సినిమా తీశాడు. ఇందులో నాతోపాటు చాలామంది డైరెక్టర్లు నటించారు. కానీ కశ్యప్‌ ఏమనుకుంటే అదే తీశాడు. మేం కూడా ఇన్‌పుట్స్‌ ఇవ్వలేదు. చెప్పింది చేశాం. అలాగే ఈ సినిమాకు టెక్నికల్‌గా మంచి టీమ్‌ కుదిరింది. నాకు నటన అంటే ఇష్టం. హీరో, విలన్‌ అని బేరీజు వేసుకోను. కథ నచ్చితే చేస్తా. ఇందులో నేను పోషించిన ధర్మా పాత్ర అందరికీ నచ్చుతుంది.