Yogita Rana | విద్యతో ఖైదీల్లో మార్పునకు చర్యలు : విద్యాశాఖ ప్రిన్సిపల్ సెక్రటరీ యోగితారాణా

Yogita Rana | అజ్ఞానమనే చీకటిని విద్య తొలగించి మానవ జీవితాల్లో జ్ఞానం, ఆత్మవిశ్వాసం వెలిగిస్తుందని తెలంగాణ ప్రభుత్వ విద్యాశాఖ ప్రిన్సిపల్ సెక్రటరీ డాక్టర్ యోగితా రాణా పేర్కొన్నారు.

హైదరాబాద్‌ : అజ్ఞానమనే చీకటిని విద్య ( Education ) తొలగించి మానవ జీవితాల్లో జ్ఞానం, ఆత్మవిశ్వాసం వెలిగిస్తుందని తెలంగాణ ప్రభుత్వ విద్యాశాఖ ప్రిన్సిపల్ సెక్రటరీ డాక్టర్ యోగితా రాణా ( Yogita Rana ) పేర్కొన్నారు. తెలంగాణ జైళ్ల శాఖ, తెలంగాణ ఓపెన్ స్కూల్ సొసైటీ (TOSS) సహకారంతో ఖైదీల కోసం ఓపెన్ స్కూలింగ్ ( Open Schooling ) కార్యక్రమాన్ని ఆమె ప్రారంభించారు.

ఆమె మాట్లాడుతూ మానవ జీవితంలో విద్య యొక్క ప్రాముఖ్యతను, శక్తిని వివరించారు. విద్య అనేది కేవలం జ్ఞానాన్ని, విద్యార్హతలను మాత్రమే కాకుండా ఆత్మవిశ్వాసం, ఆత్మగౌరవం జీవితంలోని సవాళ్లను ఎదుర్కొనే ధైర్యాన్ని ఇస్తుందని తెలిపారు. ఖైదీలు ఈ అవకాశాన్ని సద్వినియోగం చేసుకొని తమ చదువును కొనసాగిస్తూ ఉజ్వల భవిష్యత్తు వైపు అడుగులు వేయాలని పిలుపునిచ్చారు.

ఖైదీలకు విద్యను మరింత చేరువ చేయాలనే ఉద్దేశంతో జైళ్లలో ప్రత్యేక టాస్‌ కేంద్రాలను ఏర్పాటు చేస్తామని, తద్వారా వారికి అవసరమైన విద్యా సహాయం , బోధనా సదుపాయాలు కల్పిస్తామని ప్రకటించారు. ఖైదీలు విద్యను అభ్యసించేందుకు ప్రోత్సాహకంగా ప్రతి ఖైదీకి కోర్సు ఫీజులో రూ.1,250 రాయితీ కల్పిస్తున్నట్లు వెల్లడించారు. ఈ కార్యక్రమంలో భాగంగా తెలంగాణ ఓపెన్ స్కూల్ సొసైటీ (TOSS) సమాచార బ్రోచర్లను అధికారికంగా విడుదల చేశారు.  ఈ కార్యక్రమంలో తెలంగాణ జైళ్ల శాఖ డైరెక్టర్ జనరల్ డాక్టర్ సౌమ్య మిశ్రా, తెలంగాణ ఓపెన్ స్కూల్ సొసైటీ డైరెక్టర్ శ్రీ కె. లింగయ్య , అధికారులు పాల్గొన్నారు.