అందానికి ఆవిరి

అందం కోసం క్రీములను ఆశ్రయిస్తే.. అలర్జీలు దాడిచేస్తాయి. కొన్నిరకాల రసాయనాలు.. చర్మానికి హాని కలిగిస్తాయి. సహజసిద్ధమైన ఉత్పత్తులు ధర ఎక్కువ. ఇంట్లోనే తయారు చేసుకుందామంటే.. శ్రమ ఎక్కువ. ఈ సమస్యలన్నిటికీ ‘ఆవిరి’ చెక్‌ పెడుతుందని సౌందర్య నిపుణులు చెబుతున్నారు.

అందం కోసం క్రీములను ఆశ్రయిస్తే.. అలర్జీలు దాడిచేస్తాయి. కొన్నిరకాల రసాయనాలు.. చర్మానికి హాని కలిగిస్తాయి. సహజసిద్ధమైన ఉత్పత్తులు ధర ఎక్కువ. ఇంట్లోనే తయారు చేసుకుందామంటే.. శ్రమ ఎక్కువ. ఈ సమస్యలన్నిటికీ ‘ఆవిరి’ చెక్‌ పెడుతుందని సౌందర్య నిపుణులు చెబుతున్నారు. రెండు రోజులకు ఒకసారి ముఖానికి ఆవిరి పట్టిస్తే.. అందం రెట్టింపు అవుతుంది.

• ఆవిరి పట్టడం వల్ల చర్మ రంధ్రాలు తెరుచుకుంటాయి. లోపలి పొరల్లో పేరుకున్న దుమ్మూ, ధూళి తొలగిపోతుంది.
• మొటిమలకు కారణమయ్యే బ్యాక్టీరియాను తొలగించడంలో ఆవిరి సమర్థంగా పనిచేస్తుంది. బ్లాక్‌ హెడ్స్‌, వైట్‌ హెడ్స్‌నూ ఆవిరి నిర్మూలిస్తుంది.
• రెగ్యులర్‌గా ఆవిరి పడితే.. ముఖంలో రక్త ప్రసరణ మెరుగుపడుతుంది. చర్మం బిగుతుగా మారడంతోపాటు ముఖం సహజసిద్ధమైన కాంతిని సంతరించుకుంటుంది.
• ఆవిరి పట్టడం వల్ల కొలాజెన్‌, ఎలాస్టిన్‌ ఉత్పత్తి పెరుగుతుంది. ఫలితంగా, చర్మం మరింత యవ్వనంగా కనిపిస్తుంది.

రకరకాలుగా..

• రెండు గ్లాసుల నీటిలో కొన్ని గులాబీ రేకులు వేసి మరిగించాలి. ఆ నీటితో ఆవిరి పడితే.. ముఖం మరింత కాంతిమంతంగా కనిపిస్తుంది.
• రెండు గ్లాసుల నీటిని వేడిచేసి.. అందులో గ్రీన్‌టీ బ్యాగును ఉంచి ఆవిరి పట్టుకోండి. దీంతో ముఖ వర్చస్సు పెరుగుతుంది.
• నీటిలో రెండుమూడు తులసి ఆకులతోపాటు చిటికెడు పసుపు కలిపి ఆవిరి పడితే.. మొటిమలు తగ్గుముఖం పడుతాయి. చర్మం మెరిసిపోతుంది.
• ఆవిరి పట్టే నీటిలో రెండు చుక్కల కొబ్బరి నూనె వేస్తే.. చర్మం ఎక్కువ సమయంపాటు తేమగా ఉంటుంది. అయితే, ఎగ్జిమా, సొరియాసిస్‌, డెర్మటైటిస్‌ లాంటి సమస్యలు ఉన్నవారు ‘ఆవిరి’కి దూరంగా ఉండటమే మంచిది.