Visit:
సినిమాల పాత్రల పర్‌ఫెక్షన్‌ కోసం హీరోలే కాదు హీరోయిన్లు కూడా ఎక్కడా తగ్గేదేలే.. అంటోంది అందాల తార నభా నటేష్‌. ఇటీవల ప్రియదర్శితో కలిసి ‘డార్లింగ్‌’ సినిమాతో పలకరించిన ఆమె ప్రస్తుతం పలు ప్రాజెక్టులతో బిజీగా వున్నారు. అందంతో పాటు అభినయం కూడా తెలిసిన కథానాయికలు అరుదుగా వుంటారు. అలాంటి కోవలోకి వస్తుంది నభా నటేష్‌. అయితే ఆమె ఇటీవల తన మొదటి సినిమా అవకాశం గురించి, ఆ పాత్ర కోసం ఆమె చేసిన హోమ్‌ వర్క్‌ గురించి మీడియాతో మాట్లాడారు.
ఆమె మాట్లాడుతూ ” బెంగళూరులో మోడలింగ్‌తో పాటు ఓ నాటక బృందంలో చేరి నాటకాలు కూడా ప్రదర్శించడం అలవాటు చేసుకున్నాను. అప్పటికే కొన్ని వీధి నాటకాలు కూడా ప్రదర్శించాను. ఆ అనుభవంతోనే సినిమాలో ప్రయత్నించాలనే ఆలోచన వచ్చి మొదలుపెట్టాను. అప్పుడే కన్నడలో శివ రాజ్‌కుమార్‌ పక్కన వజ్రకాయలో అవకాశం వచ్చింది. ఆ షూటింగ్‌కు మూడు నెలల పాటు ట్రైనింగ్‌ తీసుకున్నాను. ఓ పల్లెటూరి అమ్మాయిలా అందులో కనిపించాను. ఈ సినిమా కోసం వచ్చిన చాలా అవకాశాల్ని కూడా వదులుకున్నాను. ఈ సినిమా కోసమే హార్స్‌ రైడింగ్‌ నేర్చుకున్నాను. అంతేకాదు నాకు అసలు పొగ అంటే పడదు. కానీ పాత్ర కోసం బీడీలు కాల్చాను. ఆ వాసన భరించలేక రెండ్రోజులు ఏమీ తినలేకపోయాను. అయితే నా కష్టానికి తగిన ప్రతిఫలం, గుర్తింపు నాకు ఆ సినిమాతో లభించింది’ అంటూ చెప్పుకొచ్చారు.
తన తెలుగు సినిమాల గురించి ఆమె మాట్లాడుతూ ” తెలుగులో నాకు మొదట అవకాశం ఇచ్చింది నటుడు, దర్శకుడు రవిబాబు. ఆయన దర్శకత్వంలో వచ్చిన ‘అదుగో’ నా మొదటి చిత్రం. రెండో సినిమా ‘నన్ను దోచుకుందువటే’. అయితే ముందుగా విడుదలైంది మాత్రం ఈ సినిమానే. ఆ తరువాత వరుసగా సినిమాలు చేశాను. చేసిన ప్రతి సినిమాలో నా నటనకు మంచి మార్కులే పడ్డాయి’ అని చెప్పారు. అంతేకాదు తన పేరు గురించి వివరిస్తూ నాన్న పేరు నటేష్‌లోని ‘న’ తీసుకుని, అమ్మ పేరు భాగ్యలోని ‘భా’ తీసుకుని ‘నభా’ అని పేరు పెట్టారని, నభా అంటే సంస్కృతంలో ఆకాశం అని అర్థం అని చెప్పింది ఈ అందాలభామ
