ప్రభుత్వ బడుల్లో ఇంకుడుగుంతలు!

• స్కూళ్లకు 14, 15వ ఫైనాన్స్‌ కమిషన్‌ నిధులు
• మార్గదర్శకాలు జారీచేసిన రాష్ట్ర ప్రభుత్వం

హైదరాబాద్‌, నవంబర్‌ 23 (నమస్తే తెలంగాణ): వర్షపు నీటి సంరక్షణ చర్యల్లో భాగంగా రాష్ట్రంలోని అన్ని ప్రభుత్వ పాఠశాలల్లో ఇంకుడుగుంతలు నిర్మించాలని ప్రభుత్వం నిర్ణయించింది. ఇందుకు 14, 15వ ఫైనాన్స్‌ కమిషన్‌ నిధులు వెచ్చించేందుకు వీలుకల్పిస్తూ మంగళవారం మార్గదర్శకాలను విడుదలచేసింది. పాఠశాలవారీగా స్కూల్‌ డెవలప్‌మెంట్‌ ప్లాన్‌ను రూపొందించి అమలుచేయాలని పంచాయతీరాజ్‌, గ్రామీణాభివృద్ధిశాఖ కమిషనర్‌ శరత్‌ ఉత్తర్వులు జారీ చేశారు. పంచాయతీలకు కేటాయించిన నిధులతో స్కూళ్లలో మౌలిక వసతుల కల్పనకు చర్యలు తీసుకోవాలని సూచించారు.

నిధులతో చేపట్టే పనులు ఇవే..

• పాఠశాల భవనాల నిర్వహణ
• సురక్షిత మంచినీరు, పైపులైన్లతో నీటి సరఫరా, హ్యాండ్‌వాష్‌లు
• బాలబాలికలకు టాయిలెట్లు, మూత్రశాలలు
• శానిటరీ ప్యాడ్‌ వెండింగ్‌ మిషన్లు, ఇన్సినరేటర్లు
• టాయిలెట్లు, ర్యాంపులు, ఇతర వసతులు
• వంటగదులు, మధ్యాహ్న భోజన కిచెన్‌షెడ్లు, కిచెన్‌ గార్డెన్లు
• విద్యుత్తు కనెక్షన్లు, భారత్‌నెట్‌ వైఫై కనెక్షన్లు
• టాయిలెట్లు, తరగతి గదుల్లో ఫ్లోరింగ్‌, ఆటస్థలాల నిర్వహణ
• బడుల్లో తలుపులు, కిటికీలు, ప్రహరీగోడలు, గేట్ల మరమ్మతులు