శ్రమ జీవులకు.. ఈ-శ్రమ్‌

• కార్మికులకు ప్రయోజనం చేకూర్చే పోర్టల్‌
• కార్డు పొందిన వారికి ప్రధానమంత్రి సురక్ష బీమా యోజన వర్తింపు

సిటీబ్యూరో, డిసెంబర్‌ 4 (నమస్తే తెలంగాణ) : ఈ -శ్రమ్‌ కార్డు పొందితే అనేక ప్రయోజనాలు ఉన్నాయని లేబర్‌ కమిషన్‌ పిలుపునిచ్చింది. ప్రతి ఒక్క కార్మికుడు తన పేరును నమోదు చేసుకోవాలని సూచించింది. కేంద్ర ప్రభుత్వం తీసుకొచ్చిన ఈ శ్రమ్‌ ప్రత్యేక పోర్టల్‌లో పేర్ల నమోదుకు అసంఘటిత రంగ కార్మికుల నుంచి ఇప్పటికే మంచి స్పందన లభిస్తోంది. ఈ పథకంతో పేర్లు నమోదు చేసుకున్న కార్మికులకు ఎంతో ప్రయోజన చేకూరుతుంది. బంజారాహిల్స్‌లోని ఎన్‌బీ నగర్‌ స్టేడియంలో ఈ శ్రమ్‌ కార్డ్స్‌ అవగాహన కార్యక్రమం జరిగింది. ఈ కార్యక్రమంలో లేబర్‌ ఆఫీసర్‌ వేణుగోపాల్‌, తెలంగాణ స్టేట్‌ డొమెస్టిక్‌ వర్కర్స యూనియన్‌ మాజీ ప్రెసిడెంట్‌ రేణుక, వైస్‌ ప్రెసిడెంట్‌ పావని, నవనీత, సురేఖ రాణి తదితరులు పాల్గొన్నారు.

అర్హతలు ఇవే..

• ఆగస్టు నుంచి కామన్‌ సర్వీస్‌ కేంద్రాల్లో ఉచితంగా పేరు నమోదు ప్రక్రియ ప్రారంభమైంది. ఆధార్‌ కార్డు, మొబైల్‌ నంబర్‌, బ్యాంకు ఖాతాలతో కేంద్రాలకు వెళ్లి పేర్లు నమోదు చేసుకొని యూనిక్‌ నంబర్‌ కేటాయిస్తున్నారు.
• ఈ శ్రమ్‌లో నమోదు కాగానే అప్పటికప్పుడే కార్డును జారీ చేస్తున్నారు. భవన నిర్మాణ కార్మికులు, వలస కార్మికులు, పాలు విక్రయించేవారు, వీధి వ్యాపారులు, ఆటో డ్రైవర్లు, పార్కుల్లో పనిచేసే కూలీలు, కూరగాయలు, పండ్ల వ్యాపారులు, క్వారీలో పనిచేసేవారు.
• క్షురకులు, ఆశా, ఆంగన్‌వాడీ కార్యకర్తలు, టైలరింగ్‌, ఆటో మొబైల్‌, ఎంబ్రాయిడరీ, చేతి వృత్తులు, కొరియర్‌ బాయ్స్‌, సేవా రంగంలో పనిచేసేవారు.
• స్వయం సహాయక సంఘాలు, విద్యావలంటీర్లు, మధ్యాహ్నం భోజన వర్కర్లు, హమాలీలు, ఫాస్ట్‌ఫుడ్‌, బేకరీలలో పనిచేసే కార్మికులు ఈ పథకానికి అర్హులు. నమోదు చేసుకోవడానికి 16 నుంచి 59 ఏళ్ల వయసు ఉండాలి.
• ఈ కార్డు ద్వారా సామాజిక భద్రత, సంక్షేమ పథకాలు, ఏడాది పాటు ప్రధానమంత్రి సురక్ష బీమా యోజన వర్తింపజేస్తారు.
• ప్రమాదవశాత్తు మృతి చెందితే రూ.2లక్షల, అంగవైకల్యం చెందితే రూ. లక్ష బీమా వర్తింపజేస్తారు.