అమెరికాతో పోరు ఎప్ప‌టికీ ముగియ‌దు : అల్ ఖైదా

ఆఫ్ఘ‌నిస్తాన్ నుంచి అమెరికా త‌మ‌ సైన్యాన్ని ఉప‌సంహ‌రించుకుని, అటు ట‌ర్కీలో శాంతి స‌మావేశాలు నిర్వ‌హించినా.. వారితో త‌మ పోరు ఎప్ప‌టికీ ముగియ‌దు అని అల్ ఖైదా ప్ర‌క‌టించింది.

April 30, 2021 / 06:48 PM IST

అమెరికాతో పోరు ఎప్ప‌టికీ ముగియ‌దు : అల్ ఖైదా

వాషింగ్టన్: ఆఫ్ఘ‌నిస్తాన్ నుంచి అమెరికా త‌మ‌ సైన్యాన్ని ఉప‌సంహ‌రించుకుని, అటు ట‌ర్కీలో శాంతి స‌మావేశాలు నిర్వ‌హించినా.. వారితో త‌మ పోరు ఎప్ప‌టికీ ముగియ‌దు అని అల్ ఖైదా ప్ర‌క‌టించింది. రానున్న రోజుల్లో తాలిబాన్ల‌తో క‌లిసి తాము ఆఫ్ఘినిస్తాన్ ఆక్ర‌మించుకునేందుకు ప్ర‌ణాళిక‌లు సిద్ధం చేసుకున్నామ‌ని స్ప‌ష్టం చేసింది. సీఎన్ఎన్‌కు ఇచ్చి ఇంట‌ర్వ్యూలో అల్ ఖైదా ఈ విష‌యాల‌ను వెల్ల‌డించింది.

అమెరికాలో సెప్టెంబ‌ర్ 11 దాడుల‌కు ప్ర‌ధాన సూత్ర‌ధారి అయిన త‌మ నాయ‌కుడు ఒసామా బిన్ లాడెన్‌ను మ‌ట్టుపెట్టిన అమెరికాను ఏనాటికి విడిచిపెట్టేది లేద‌ని అల్ ఖైదా తెలిపింది. వారితో త‌మ పోరాటం ఎప్ప‌టికీ ముగియ‌ద‌ని స్ప‌ష్టం చేసింది. ఆఫ్ఘ‌నిస్తాన్ నుంచి అమెరికా సైనిక బ‌ల‌గాలు వైదొలిగిన మ‌రుక్ష‌ణ‌మే తాలిబాన్ల సాయంతో ఆఫ్ఘ‌నిస్తాన్‌కు వ‌చ్చి ఆక్ర‌మించుకునేందుకు ప్లాన్ చేసుకున్నామ‌ని వెల్ల‌డించింది.

ఆఫ్ఘనిస్తాన్‌కు కృతజ్ఞతలు తెలిపిన అల్-ఖైదా ప్రతినిధి, తమ‌ దేశంలోని అన్ని జిహాదీ సంస్థలకు ఆశ్రయం కల్పించార‌ని హ‌ర్షం వ్య‌క్తం చేశారు. ఇలాంటి జిహాదీ సంస్థలన్నీ చాలా కాలంగా ప్రపంచంలోని ఇతర ఇస్లామిక్ దేశాలలో కూడా చురుకుగా పనిచేస్తున్నాయి.

సెప్టెంబ‌ర్ 11 నుంచి సైన్యం ఉపసంహర‌ణ ప్రారంభం అవుతుంద‌ని యునైటెడ్ స్టేట్స్ ప్రకటించింది. అయితే, గ‌తంలో చేసుకున్న ఒప్పందం మేర‌కు మే 1వ తేదీ నుంచి త‌మ సైన్యాన్ని త‌ర‌లించాడం మొదలుపెట్టాల‌ని తాలిబాన్లు ఇప్ప‌టికీ డిమాండ్ చేస్తున్నారు. అమెరికా త‌న బ‌ల‌గాల‌ను వైదొలిగిన అనంత‌రం ఆఫ్ఘ‌నిస్తాన్‌లో స‌మ‌స్య‌లు మ‌రిన్ని పెరిగే అవ‌కాశాలు క‌నిపిస్తున్నాయి.

సైన్యాన్ని ఉపసంహరించుకునే సమయంలో తమ‌ సైనికులపై తాలిబాన్లు పెద్ద ఎత్తున‌ దాడులు జరిపే అవ‌కాశాలు ఉన్నాయ‌ని అమెరికాకు బలమైన సమాచారం అందింది. దాంతో నాలుగు బీ -52 ఫైటర్ జెట్లను, ఆర్మీ రేంజర్ టాస్క్ ఫోర్స్‌ను మధ్యప్రాచ్యంలో మోహరించాలని పెంట‌గాన్ నిర్ణయించింది.