క‌రోనా కాటుకు షూట‌ర్ దాదీ క‌న్నుమూత‌

క‌రోనా వైర‌స్ సోకి చికిత్స పొందుతూ వెటరన్ షూటర్ దాది చంద్ర తోమర్ (89) మర‌ణించింది

April 30, 2021 / 05:00 PM IST

బాగ్‌ప‌ట్‌ : క‌రోనా వైర‌స్ సోకి చికిత్స పొందుతూ వెటరన్ షూటర్ దాది చంద్ర తోమర్ (89) మర‌ణించింది. గ‌త మూడు రోజులుగా క‌రోనాతో బాధ‌ప‌డిన దాదీని మీరట్ మెడికల్ కాలేజీలో చేర్పించి చికిత్స అందించారు. చివ‌ర‌కు శ్వాస‌తీసుకోవ‌డంలో ఇబ్బంది ప‌డ‌టంతోపాటు మెద‌డులో ర‌క్త‌స్రావం జ‌రిగి దీదీ చంద్ర తోమ‌ర్ మ‌ర‌ణించిన‌ట్లు ద‌వాఖాన వ‌ర్గాలు తెలిపాయి.

షూటర్ దాది అని పిలుచుకునే చంద్రో తోమర్ ముజఫర్ నగర్‌లో జన్మించారు. మూడు రోజుల క్రితం క‌రోనా వైర‌స్‌కు గురై బాగ్‌ప‌ట్‌లోని ఆనంద్ ద‌వాఖాన‌లో చేర్చారు. అక్కడ ఆమె ప‌రిస్థితి విష‌మించ‌డంతో గురువారం రాత్రి మీర‌ట్ మెడిక‌ల్ కాలేజీ ద‌వాఖాన‌కు త‌ర‌లించారు. చికిత్స పొందుతూ శుక్ర‌వారం ఉద‌యం ఆమె మ‌ర‌ణించార‌ని ద‌వాఖాన యాజ‌మాన్యం, కుటుంబీకులు తెలిపారు.

ఎన్నో అవార్డులు.. మ‌రెన్నో ప‌తకాలు..

షూటర్ దాదీగా ప్రసిద్ది చెందిన చంద్రో తోమర్ అనేక జాతీయ పోటీల్లో ప‌త‌కాలు సాధించింది. ప్రపంచంలోని పురాతన షూటర్‌గా పరిగణించబ‌డింది. తన సోదరి ప్రకాశి తోమర్‌తో క‌లిసి పలు జాతీయ‌, అంత‌ర్జాతీయ‌ పోటీల్లో పాల్గొని ప‌త‌కాలు సాధించింది. ప్ర‌పంచంలోని పురాతన మహిళా షూటర్లలో ప్రకాషి కూడా ఉన్నారు.

దాదీ చంద్ర తోమర్, ప్రకాశి తోమర్ నిజ జీవిత కథ ఆధారంగా బాలీవుడ్ చిత్రం సాండా కి ఆంఖ్రూ రూపొందించారు. సీనియర్ సిటిజన్ విభాగంలో కూడా షూటర్ దాదీ పలు ప‌త‌కాలను గెలుచుకున్నారు. వీటిలో రాష్ట్రపతి స్వయంగా సమర్పించిన స్త్రీ శక్తి సమ్మన్ కూడా ఉన్న‌ది.