అసెంబ్లీ ఎథిక్స్‌ కమిటీ భేటీ మళ్లీ వాయిదా

బీఆర్‌ఎస్‌ హుజూరాబాద్‌ ఎమ్మెల్యే పాడి కౌశిక్‌రెడ్డిపై వచ్చిన ఫిర్యాదులపై వరుసగా విచారణ జరుపుతున్న అసెంబ్లీ ఎథిక్స్‌ కమిటీ సమావేశం మరోమారు వాయిదా పడింది. తిరిగి వచ్చే నెల 5న సమావేశమై స్పీకర్‌ను కౌశిక్‌రెడ్డి కోరిన అంశంతోపాటు బీఆర్‌ఎస్‌ ఇచ్చిన ఫిర్యాదులపైనా చర్చించాలని నిర్ణయింయింది.

• ఎమ్మెల్యే కౌశిక్‌రెడ్డి అంశంపై నవంబర్‌ 5న భేటీ
• కౌశిక్‌రెడ్డిపై కక్ష సాధింపు సరికాదన్న బీఆర్‌ఎస్‌
• విచారణార్హత లేని కేసును మూసేయండి: వేముల
• క్రాస్‌ ఎగ్జామినేషన్‌ వినతికి కమిటీ చైర్మన్‌ తిరసరణ

హైదరాబాద్‌, అక్టోబర్‌ 23 (నమస్తే తెలంగాణ) : బీఆర్‌ఎస్‌ హుజూరాబాద్‌ ఎమ్మెల్యే పాడి కౌశిక్‌రెడ్డిపై వచ్చిన ఫిర్యాదులపై వరుసగా విచారణ జరుపుతున్న అసెంబ్లీ ఎథిక్స్‌ కమిటీ సమావేశం మరోమారు వాయిదా పడింది. తిరిగి వచ్చే నెల 5న సమావేశమై స్పీకర్‌ను కౌశిక్‌రెడ్డి కోరిన అంశంతోపాటు బీఆర్‌ఎస్‌ ఇచ్చిన ఫిర్యాదులపైనా చర్చించాలని నిర్ణయింయింది. అసెంబ్లీ కమిటీ హాలులో శుక్రవారం ఎథిక్స్‌ కమిటీ చైర్మన్‌ రేవూరి ప్రకాశ్‌రెడ్డి అధ్యక్షతన జరిగిన సమావేశానికి కమిటీ సభ్యులు వేముల ప్రశాంత్‌రెడ్డి (బీఆర్‌ఎస్‌), కూనంనేని సాంబశివరావు (సీపీఐ), పైడి రాకేశ్‌రెడ్డి (బీజేపీ), జీ మధుసూదన్‌రెడ్డి (కాంగ్రెస్‌) హాజరయ్యారు. కమిటీ సభ్యులు పద్మారావుగౌడ్‌ (బీఆర్‌ఎస్‌), వెడ్మ బొజ్జు (కాంగ్రెస్‌) వ్యక్తిగత కారణాలతో హాజరుకాలేదు. ఈ సమావేశంలో ఎథిక్స్‌ కమిటీకి పాడి కౌశిక్‌రెడ్డి ఇటీవల ఇచ్చిన లిఖితపూర్వక సమాధానంపై సుదీర్ఘంగా చర్చించారు. ఈ సందర్భంగా వేముల ప్రశాంత్‌రెడ్డి పలు అంశాలను లేవనెత్తారు.

ఆధారాల్లేకుండా చర్యలా?

కౌశిక్‌రెడ్డికి అందజేసిన రెండు నిముషాల వీడియో క్లిప్పులో ఎలాంటి వ్యాఖ్యలు, శబ్దాలూ లేవని.. కేవలం హావభావాలు మాత్రమే ఉన్న విషయాన్ని కమిటీ దృష్టికి వేముల ప్రశాంత్‌రెడ్డి తీసుకొచ్చారు. సభ్యుడి హావభావాల ఆధారంగా చర్యలు ఎలా తీసుకుంటారని ప్రశ్నించారు. ఈ కేసుకు ఎంతమాత్రం విచారణార్హత లేదని స్పష్టంచేశారు. ఎమ్మెల్యే కడియం శ్రీహరి చేసిన రెచ్చగొట్టే వ్యాఖ్యలతోనే వివాదం మొదలైందని పేర్కొన్నారు. ఆఫ్‌ ది మైక్‌లో శ్రీహరి చేసిన, సభా రికార్డుల్లోకి ఎకని రీతిలో ఉన్న వ్యాఖ్యల పూర్తి వీడియో క్లిప్పు కూడా ఇవ్వాలని ప్రశాంత్‌రెడ్డి కోరారు. కౌశిక్‌రెడ్డి వ్యక్తిగతంగా హాజరై వివరణ ఇచ్చేందుకు సమయం ఇవ్వాలని సమావేశంలో నిర్ణయించినట్టు తెలిసింది. కడియం శ్రీహరి క్రాస్‌ ఎగ్జామినేషన్‌కు బీఆర్‌ఎస్‌ చేసిన వినతిని కమిటీ చైర్మన్‌ తిరసరించినట్టు తెలిసింది.