Chandrababu | ఆర్నబ్ తుఫాన్‌ కారణంగా జరిగిన నష్టాన్ని కేంద్ర ప్రభుత్వ దృష్టికి తీసుకెళ్లాలి : సీఎం చంద్రబాబు

Chandrababu | ఆంధ్రప్రదేశ్‌లో ఆర్నబ్ తుఫాన్‌ కారణంగా జరిగిన నష్టాన్ని కేంద్ర ప్రభుత్వ దృష్టికి తీసుకెళ్లాలని సీఎం చంద్రబాబు అధికారులను ఆదేశించారు.

అమరావతి : ఆంధ్రప్రదేశ్‌లో ఆర్నబ్ తుఫాన్‌ (Cyclone Arnab ) కారణంగా జరిగిన నష్టాన్ని కేంద్ర ప్రభుత్వ దృష్టికి తీసుకెళ్లాలని సీఎం చంద్రబాబు ( Chandrababu ) అధికారులను ఆదేశించారు. తుఫాన్‌ సమయంలో తీసుకోవాల్సిన చర్యలపై రాష్ట్ర స్థాయి నుంచి క్షేత్రస్థాయి యంత్రాంగం ,సిబ్బంది వరకు బుధవారం తెల్లవారుజామున నిర్వహించిన టెలీకాన్ఫరెన్స్‌లో మాట్లాడారు. ఆర్నబ్ తుఫాన్‌ కారణంగా రాష్ట్రంలో జరిగిన పంట నష్టంపై ఆరా తీశారు. ప్రాథమిక సమాచారం ప్రకారం సుమారు 5 వేల హెక్టార్లలో అరటి పంట, 8 వేల హెక్టార్లలో కొబ్బరి తోటలు ధ్వంసమైనట్లు అధికారులు వెల్లడించారు.

రాష్ట్ర ప్రభుత్వం చేపడుతున్న సహాయక చర్యలను కేంద్రానికి వివరించడంతో పాటు, పంట నష్టానికి సంబంధించిన పూర్తి వివరాలతో నివేదిక రూపొందించాలని తెలిపారు. ఎక్కడైనా ప్రాణనష్టం సంభవించిందా అని అధికారులను అడిగి తెలుసుకున్నారు. ప్రస్తుతానికి ఎలాంటి ప్రాణనష్టం జరగలేదని అధికారులు సీఎంకు నివేదించారు. చెరువులు పొంగిపొర్లకుండా ముందస్తు జాగ్రత్తలు తీసుకోవాలని, సాగునీటి సంఘాలతో సమన్వయం చేసుకోవాలని కలెక్టర్లకు సూచించారు. చెరువులు, కాల్వలకు గండ్లు పడకుండా జాగ్రత్తలు తీసుకోవాలని, స్వర్ణ గ్రామ, వార్డు కార్యాలయాలకు ఎప్పటికప్పుడు సమాచారం అందించాలని స్పష్టం చేశారు. తుఫాన్‌ షెల్టర్లలో ఆశ్రయం పొందుతున్న వారిని పరిస్థితులు పూర్తిగా కుదుటపడిన తర్వాతే ఇళ్లకు పంపాలని సీఎం చంద్రబాబు అధికారులకు ఆదేశించారు.