ఇక కేజ్రీ కంటే లెఫ్టినెంట్ గ‌వ‌ర్న‌ర్ ప‌వ‌ర్‌ఫుల్‌!

March 28, 2021 / 11:59 PM IST

న్యూఢిల్లీ: ఢిల్లీ సీఎం అర‌వింద్ కేజ్రీవాల్‌కు గ‌ట్టి ఎదురు దెబ్బ త‌గిలింది. ఢిల్లీ లెఫ్టినెంట్ గ‌వ‌ర్న‌ర్‌కు అధిక అధికారాలు క‌ల్పిస్తూ పార్ల‌మెంట్ ఆమోదించిన.. గ‌వ‌ర్న‌మెంట్ ఆఫ్ నేష‌న‌ల్ క్యాపిట‌ల్ టెరిటోరి ఆఫ్ ఢిల్లీ (స‌వ‌ర‌ణ‌) బిల్లు, 2021కి రాష్ట్ర‌ప‌తి రామ్‌నాథ్ కోవింద్ ఆదివారం ఆమోద ముద్ర వేశారు. దీంతో కేంద్రంలోని బీజేపీ స‌ర్కార్‌కు, ఢిల్లీలోని ఆమ్ ఆద్మీ పార్టీ (ఆప్‌) ప్ర‌భుత్వానికి మ‌ధ్య మ‌రో వివాదానికి తెర లేచింది.

బుధ‌వారం ఈ బిల్లుపై రాజ్య‌స‌భ‌లో గంద‌ర‌గోళం జ‌రిగింది. విప‌క్షం వాకౌట్ చేయ‌డంతో రాజ్య‌స‌భ బిల్లును ఆమోదించింది. అంత‌కుముందు ఈ నెల 22వ తేదీన లోక్‌స‌భ ఈ బిల్లుకు ఆమోదం తెలిపింది. దీంతో కేంద్రంపై అర‌వింద్ కేజ్రీవాల్ నిప్పులు చెరిగారు.

ఢిల్లీ ప్ర‌జ‌లు ఎన్నుకున్న ప్ర‌భుత్వం నుంచి అధికారాల‌ను లాగేసుకోవాల‌ని బీజేపీ ప్ర‌య‌త్నిస్తున్న‌ద‌ని కేజ్రీవాల్‌ మండిప‌డ్డారు. గ‌వ‌ర్న‌ర్‌కు అధికారాలు క‌ల్పించి, తెర వెనుక నుంచి పాల‌న సాగించేందుకు ప్ర‌య‌త్నిస్తున్న‌ద‌ని ఆరోపించారు.

ఇక నుంచి ఆప్ స‌ర్కార్ ఏదేనా నిర్ణ‌యం తీసుకోవాలంటే ముందుగా లెఫ్టినెంట్ గ‌వ‌ర్న‌ర్ అనుమ‌తి తీసుకున్న త‌ర్వాతే అసెంబ్లీలో బిల్లును ప్ర‌వేశ‌పెట్టి శాస‌నంగా మార్చాలి. ఏదైనా కార్య నిర్వాహ‌క నిర్ణ‌యం అమ‌లు చేయాలంటే త‌ప్ప‌నిస‌రిగా లెఫ్టినెంట్ గ‌వ‌ర్న‌ర్ స‌మ్మ‌తి పొందాల్సిందే. ఇంత‌కుముందు కూడా ఢిల్లీ సీఎంకు, లెఫ్టినెంట్ గ‌వ‌ర్న‌ర్‌కు మ‌ధ్య ప‌లు ద‌ఫాలు వివాదాలు నెల‌కొన్నాయి.