హెచ్‌ఎండీఏలో మరో అవినీతి అధికారి

హైదరాబాద్‌ మెట్రోపాలిటన్‌ డెవలప్‌మెంట్‌ అథారిటీ (హెచ్‌ఎండీఏ)లో మరో అవినీతి అధికారి వెలుగులోకి వచ్చారు. ఈసారి చీఫ్‌ ఇంజినీర్‌ బీ రవీందర్‌ ఆదాయానికి మించిన ఆస్తులు సంపాదించినట్టు గుర్తించి.. మంగళవారం ఉదయం అతడి ఇల్లు, కార్యాలయాలపై ఏసీబీ అధికారులు దాడులు నిర్వహించారు.

• చీఫ్‌ ఇంజినీర్‌ రవీందర్‌ ఇండ్లు, ఆఫీసుల్లో ఏసీబీ సోదాలు
• నిజామాబాద్‌, మెదక్‌, హైదరాబాద్‌లో తనిఖీలు
• 11 చోట్ల సోదాల్లో రూ.70 కోట్ల అక్రమాస్తుల గుర్తింపు

హైదరాబాద్‌, జూలై 14 (నమస్తే తెలంగాణ): హైదరాబాద్‌ మెట్రోపాలిటన్‌ డెవలప్‌మెంట్‌ అథారిటీ (హెచ్‌ఎండీఏ)లో మరో అవినీతి అధికారి వెలుగులోకి వచ్చారు. ఈసారి చీఫ్‌ ఇంజినీర్‌ బీ రవీందర్‌ ఆదాయానికి మించిన ఆస్తులు సంపాదించినట్టు గుర్తించి.. మంగళవారం ఉదయం అతడి ఇల్లు, కార్యాలయాలపై ఏసీబీ అధికారులు దాడులు నిర్వహించారు. ఏసీబీ సిటీ రేంజ్‌-1 అధికారులు రవీందర్‌తోపాటు ఆయన బంధువులు, స్నేహితులు, బినామీలకు చెందిన ఇండ్లు, కార్యాలయాలు సహా 11 ప్రదేశాల్లో తనిఖీ చేశారు.

హైదరాబాద్‌, నిజామాబాద్‌, రంగారెడ్డి, మెదక్‌లో జరిగిన ఈ సోదాల్లో స్థిర, చరాస్తులకు సంబంధించిన పత్రాలు లభ్యమయ్యాయి. రూ.9.24 కోట్ల అక్రమాస్తులు వెలుగులోకి వచ్చాయి. బహిరంగ మార్కెట్‌లో వాటి విలువ సుమారు రూ.70 కోట్లకు పైనే ఉంటుందని ఏసీబీ వర్గాలు చెప్తున్నాయి. దీంతో అవినీతి నిరోధక చట్టం-1988 (2018 సవరణతో)లోని సెక్షన్‌ 13(1)(బీ), 13(2) ప్రకారం అతడిని అదుపులోకి తీసుకొని న్యాయమూర్తి ఎదుట ప్రవేశపెట్టగా.. 14రోజుల రిమాండ్‌ విధించారు.

ఏసీబీ అధికారులు గుర్తించిన ఆస్తులు..

• కొండకల్‌, కిష్టాపూర్‌, పాసమలలో రూ. 38,89,700 విలువైన 5 ప్లాట్లు
• నార్సింగి, నానక్‌రామ్‌గూడలో రూ. 2,07,40,000 విలువైన 4 ఫ్లాట్లు
• కొత్తూరు మండలం గూడూరు, శంషాబాద్‌లో రూ.60 లక్షల విలువైన 4 ఎకరాల భూమి
• శంకర్‌పల్లి మండలం, మోకిల, శ్రీవారి మెడోస్‌లో రూ. 1,33,58,800 విలువైన 300 చదరపు గజాల విల్లా
• కొండాపూర్‌లోని మసీద్‌ బండ వద్ద రూ. 3 కోట్ల విలువైన 300 చదరపు గజాల జీ+4 భవనం
• రూ.3,82,000 నగదు స్వాధీనం
• రూ.45,05,776 బ్యాంక్‌ బ్యాలెన్స్‌
• 1,440 గ్రాముల రూ. 36,70,000 విలువైన బంగారు ఆభరణాలు
• 12.5 కిలోల రూ.10 లక్షల విలువైన వెండి ఆభరణాలు
• రూ.17,24,000 విలువైన గృహోపకరణాలు
• రూ.9,32,000 విలువైన ఎలక్ట్రానిక్‌ పరికరాలు స్వాధీనం
• రూ.1,16,00,000 విలువైన 4 వాహనాలు (ఇన్నోవా రూ.40 లక్షలు, టాటా సఫారీ రూ.31లక్షలు, ఇన్నోవా క్రిస్టా రూ.25 లక్షలు, మహీంద్రా ఎక్స్‌యూవీ రూ. 20, లక్షలు)లను గుర్తించారు. ఆస్తుల విలువ రూ. 9, 24, 02,276 ఉంటుందని ఏసీబీ అధికారులు అంచనా వేయగా.. బహిరంగ మార్కెట్‌లో వాటి విలువ రూ.70 కోట్లకు పైగానే ఉంటుందని చెప్పారు.