హాలీవుడ్‌ వద్దంటే బాలీవుడ్‌ ఉందిగా

ఉక్రెయిన్‌పై రష్యా యుద్ధంతో ఆ దేశానికి తమ సినిమాలు పంపిణీ చేయమని తేల్చి చెప్పాయి హాలీవుడ్‌ నిర్మాణ సంస్థలు. దాంతో ప్రత్యామ్నాయంగా భారతీయ చిత్రాల వైపు చూస్తున్నాయి రష్యా సినీ వర్గాలు. రష్యాలో సినిమాలు చూడటమే ప్రధాన కాలక్షేపం. గతేడాది అక్కడి బాక్సాఫీస్‌లో 75శాతం విదేశీ చిత్రాలే వసూళ్లు సాధించాయి. ఈ క్రమంలో హాలీవుడ్‌ చిత్రాలకు బదులు బాలీవుడ్‌, కొరియన్‌, ఇతర ఆసియా దేశాల సినిమాలు తమ ప్రజలకు చూపించబోతున్నారు. రష్యన్‌ సినీ వర్గాలు తాజాగా మాట్లాడుతూ…‘మా ప్రజలకు విరామ సమయాల్లో సినిమానే ప్రధాన కాలక్షేపం. హాలీవుడ్‌ కాదంటే బాలీవుడ్‌ లాంటి ఏషియన్‌ మూవీస్‌, కొరియన్‌ చిత్రాలను ప్రదర్శిస్తాం’ అని అన్నారు. ఈ నిర్ణయంతో పాన్‌ ఇండియా సినిమాలైన ‘రాధే శ్యామ్‌’, ‘ఆర్‌ఆర్‌ఆర్‌’ వంటి వాటికి అదనపు ప్రదర్శనలు, ఆదాయం లభించే అవకాశం ఉంది.