సీట్‌ బెల్ట్‌పై అఖండ అవగాహన

• సినిమాలోని సీన్‌ను ట్విట్టర్‌లో పోస్ట్‌ చేసిన ట్రాఫిక్‌ సీపీ
• హీరో, డైరెక్టర్లకు ధన్యవాదాలు

సిటీబ్యూరో, జనవరి 22 (నమస్తే తెలంగాణ): ‘అఖండ’ తెలుగు సినిమాలో హీరో, హీరోయిన్‌ జీపులో వెళ్తుండగా.. హీరో సడన్‌ బ్రేక్‌ వేయడంతో.. పక్క సీట్లో కూర్చున్న హీరోయిన్‌ తల ముందు గుద్దుకుంటుండగా హీరో ఆమె నుదిటిపై చేయి పెట్టి దెబ్బ తగలకుండా ఆపుతాడు.. ఇదంతా హీరోయిన్‌ సీట్‌ బెల్ట్‌ పెట్టుకోకపోవడంతోనే జరిగిందనే సందేశాన్ని సినిమాలో చూపించారు. సినిమాలో ఐఏఎస్‌ అధికారి పాత్రలో ఉండే హీరోయిన్‌ సీట్‌బెల్ట్‌ పెట్టుకోకుండా తాను ఎంతో తప్పు చేశాననే విధంగా అక్కడ సన్నివేశం ఉంటుంది. సీట్‌ బెల్ట్‌ ప్రాముఖ్యత గురించి ఆ సినిమాలో హీరో బాలకృష్ణ, డైరెక్టర్‌ బోయపాటి శ్రీను చక్కగా వివరించారని హైదరాబాద్‌ ట్రాఫిక్‌ జాయింట్‌ సీపీ రంగనాథ్‌ ప్రశంసించారు. ఆ సన్నివేశాన్ని ‘ట్విట్టర్‌’లో పోస్టు చేశారు. రోడ్డు సేఫ్టీపై అవగాహన తెచ్చే విధంగా సన్నివేశాన్ని చిత్రీకరించి ప్రజల్లో అవగాహన తెచ్చేందుకు తమ వంతు కృషి చేసిన హీరో, డైరెక్టర్లకు ధన్యవాదాలు తెలిపారు.

కారులో సీట్‌బెల్ట్‌, ద్విచక్రవాహనంపై హెల్మెట్‌ తప్పనిసరి
కారులో వెళ్లే వారు తప్పని సరిగా సీట్‌ బెల్ట్‌ పెట్టుకోవడం, ద్విచక్రవాహనాలపై వెళ్లే వారు హెల్మెట్‌ ధరించడంతో అనుకోకుండా జరిగే ప్రమాదాలలో ప్రాణహాని నుంచి తప్పించుకునేందుకు అవకాశముంటుంది. ఈ నిబంధనలు పాటించకపోవడంతో ప్రతియేడు వందల సంఖ్యలో వాహనదారులు మృత్యువాత పడుతున్నారు. రోడ్డు భద్రతలో భాగంగా ట్రాఫిక్‌ నిబంధనలపై అవగాహన తీసుకొచ్చేందుకు ట్రాఫిక్‌ పోలీసులు నిరంతరం ప్రయత్నిస్తున్నారు. సినిమాలో కూడా ట్రాఫిక్‌ నిబంధనలకు సంబంధించిన అంశాలు ప్రజల్లో అవగాహన తీసుకు వచ్చేవిధంగా ఉండటంతో ప్రజలు తప్పకుండా పాటిస్తారు.