Hemanth Kumar | చెన్నై మహానగరంలో.. గందరగోళపు బతుకులతో.. మనుషులు సాటి మనిషి ఉనికినేమరిచిపోయిన వాతావరణంలో.. ఓ నిశ్శబ్ద యోధుడు మానవత్వం మీద ఆశలు చిగురింపజేస్తున్నాడు. అతనే 23 ఏండ్ల హేమంత్ కుమార్. ఫుట్పాత్లే ఆవాసంగా బతుకీడుస్తున్న అభాగ్యుల సేవకు అంకితమయ్యాడు ఆ యువకుడు. ఇల్లు, ఆఫీస్ మధ్య బైక్ మీద ప్రయాణిస్తున్నప్పుడు.. రోడ్డు వెంబడి దీనంగా కనిపించే వారిని చూసిన ప్రతిసారీ హేమంత్ గుండె తరుక్కుపోయేది. వాళ్లకు చేతనైనంత సాయం చేయాలనే నిర్ణయానికి వచ్చాడు. 18 నెలలుగా ఆ సేవా యజ్ఞమే చేస్తున్నాడు. ఈ నిర్ణయం వెనక మరో నేపథ్యమూ ఉంది.
ఒకసారి హేమంత్ కొందరు నిరుపేద బాలికల్ని కలుసుకున్నాడు. వారికి చాక్లెట్లు ఇచ్చాడు. ఆ క్షణంలో వారి మొహాల్లో కనిపించిన మెరుపు అతనిపై ప్రగాఢ ప్రభావం చూపింది. ఒక చిన్న మిఠాయే అంత సంతోషాన్ని ఇస్తే… అవసరంలో ఉన్నవారిని ఆదుకుంటే ఇంకెంత సంతృప్తి దొరుకుతుందో అనిపించింది. ఆ క్షణమే అభాగ్యులకు చేతనైనంత సాయం చేయాలని సంకల్పించుకున్నాడు. వెంటనే కార్యరంగంలో దిగాడు. అయితే, ఎవరికైనా సాయం చేస్తున్నప్పుడు హేమంత్ తానెవరో తెలియకుండా మొహాన్ని హెల్మెట్తో కప్పేసుకుంటాడు. సాయం పొందినవాళ్లు.. ఆశీర్వదించడానికి మొహం చూపించమన్నా ఒప్పుకోడు. ఇదంతా ఓ ప్రచార ఆర్భాటమని హేమంత్ మీద విమర్శలూ వచ్చాయి. వాటిని అతను పట్టించుకోలేదు. అలా విమర్శించిన వారు సైతం పరోపకార మహత్కార్యంలో హేమంత్తో జట్టుకట్టడం విశేషం. మెరీనాబీచ్ మొదలు బీసెంట్ నగర్ వరకు చెన్నైలోని వివిధ ప్రాంతాల్లో హేమంత్ కార్యకలాపాలు చురుకుగా కొనసాగుతున్నాయి. ఆకలితో ఉన్నవారికి ఆహారం, ఎండలో ఉన్నవారికి టోపీలు, గొంతెండిన వారికి పండ్లరసాలు, వర్షంలో తడుస్తున్నవారికి గొడుగులు లాంటివి
అందిస్తాడు అతను. ‘సాయం అందుకుంటున్నప్పుడు ఎదుటివారి మొహాల్లో ఒకరకమైన ఆనందం కనిపిస్తుంది. ఆ వెలుగే నాకు స్ఫూర్తి. నా కార్యక్రమాలను జీవితాంతం కొనసాగిస్తాను’ అని కృతనిశ్చయంతో చెబుతాడు హేమంత్.
“Ameen Khwaja | చెప్పులు కుట్టే స్థాయి నుంచి ఎలక్ట్రానిక్స్ రంగంలో కింగ్లా మారాడు!”
Inspiration | తిందాం.. తిరుగుదాం.. వీళ్లలా డబ్బులు సంపాదిద్దాం!”