న్యూఢిల్లీ, నవంబర్ 8: అతడు అమెరికాలోని ఓ పెద్ద కంపెనీకి చీఫ్ ఫైనాన్షియల్ ఆఫీసర్ (సీఎఫ్వో). కానీ తాగితే ఒళ్లు తెలియదు. పూటుగా మందు తాగి రోడ్డు మీదకు వచ్చాడు. నిలబడటం వల్ల కాలేదు. ఎదురుగా కనిపించిన ఇంటిలోకి దూరి బట్టలు విప్పేసి బెడ్డు మీదకు జారుకున్నాడు. కాసేపటికి ఇంటి యజమానురాలు వచ్చింది. తన ఇంట్లో ఆగంతకుడు.. తన మంచం మీద ఒళ్లు తెలియకుండా నిద్రపోతున్నాడు. ఆమె వెంటనే పోలీసులకు కబురు చేసింది. పోలీసులు వచ్చి తట్టి లేపితే గురుడు సణుగుతున్నాడు కానీ లేవలేకపోతున్నాడు.
ఇది తాగుడు కేసని వారికి అర్థమైంది. టైసన్ ఫుడ్ కంపెనీ సీఎఫ్వో జాన్ ఆర్ టైసన్ (32) దుస్థితి ఇది. అమెరికాలో మాంసం వ్యాపారంలో దిగ్గజ కంపెనీల్లో టైసన్ ఒకటి. కంపెనీ వ్యవస్థాపకుని మునిమనుమడు ఇలా మందుబానిస కావడం గురించి సోషల్ మీడియాలో వైరల్ అవుతున్నది. ఈ ఘటన అమెరికాలోని అర్కన్సాస్లో జరిగింది. తాగి వీధుల్లోకి రావడం, వేరేవాళ్ల ఇంటిలో జొరబడటం అనే నేరాల కింద పోలీసులు కేసు నమోదు చేశారు. కంపెనీవారు దీనిపై మాట్లాడేందుకు నిరాకరించారు.