ఆక్రమణల పై నిర్లక్ష్యం.. కమిషనర్‌ జీతం నిలిపివేత

ముంబైలోని బొరివలిలో బెస్ట్‌ బస్‌ స్టేషన్‌ కోసం కేటాయించిన ప్రభుత్వ భూమిలో ఆక్రమణలు తొలగించకపోవడంపై సుప్రీంకోర్టు తీవ్ర ఆగ్రహం వ్యక్తం చేసింది.

ముంబై: ముంబైలోని బొరివలిలో బెస్ట్‌ బస్‌ స్టేషన్‌ కోసం కేటాయించిన ప్రభుత్వ భూమిలో ఆక్రమణలు తొలగించకపోవడంపై సుప్రీంకోర్టు తీవ్ర ఆగ్రహం వ్యక్తం చేసింది. బృహన్‌ ముంబై మున్సిపల్‌ కార్పొరేషన్‌(బీఎంసీ) కమిషనర్‌ అశిని సతీష్‌ భిడేతో పాటు ఇతర అధికారుల నవంబర్‌ జీతాలు నిలిపివేస్తూ మంగళవారం ఆదేశించింది.

కమిషనర్‌పై కోర్టు ధిక్కరణ చర్యలు ప్రారంభించి, షోకాజ్‌ నోటీసు జారీ చేసింది. ప్రధాన న్యాయమూర్తి జస్టిస్‌ సూర్యకాంత్‌ నేతృత్వంలోని త్రిసభ్య ధర్మాసనం మరో 30 రోజుల గడువు ఇవ్వాలన్న బీఎంసీ విజ్ఞప్తిని తిరస్కరించింది. రూ. 5 లక్షల జరిమానాను విధించింది. కోర్టు ఆదేశాలు అమలు చేసేవరకు జీతాలు చెల్లించరాదని, డిసెంబర్‌ 1 వరకు జీతం తీసుకోలేరని స్పష్టం చేసింది.