నూపుర్‌ శర్మకు తలంటు

• నోటి దురుసుతో దేశంలో చిచ్చు రాజేశారు
• అధికార పార్టీ అయితే ఏమైనా మాట్లాడొచ్చా?
• ఇతరులను అరెస్టు చేసి ఆమెనెందుకు వదిలేశారు?
• ముప్పు ఆమెకు కాదు.. ఆమె వల్లే దేశానికి ముప్పు
• దేశప్రజలకు వెంటనే ఆమె క్షమాపణలు చెప్పాలి
• నూపుర్‌ శర్మపై సుప్రీం తీవ్రస్థాయిలో మండిపాటు
• ఇకనైనా బీజేపీ సిగ్గుతో ఉరేసుకోవాలన్న విపక్షం

న్యూఢిల్లీ, జూలై 1: మహమ్మద్‌ ప్రవక్తపై బీజేపీ మాజీ అధికార ప్రతినిధి నూపుర్‌ శర్మ వ్యాఖ్యలపై సుప్రీంకోర్టు ఆగ్రహం వ్యక్తంచేసింది. ఆమె వ్యాఖ్యల వల్ల దేశభద్రతకే ముప్పు వాటిల్లిందని మండిపడింది. టీవీ చర్చలో అహంకారంతో ఆమె చేసిన వ్యాఖ్యల తర్వాత దేశవ్యాప్తంగా జరిగిన అన్ని ఘటనలకు నూపుర్‌ శర్మయే ఏకైక బాధ్యురాలని స్పష్టంచేసింది. నోటిదురుసుతో వివాదాస్పద వ్యాఖ్యలు చేసి.. దేశంలో మంటలు రేపినందుకు.. టీవీ ముందుకు వచ్చి జాతి ప్రజలకు ఆమె వెంటనే క్షమాపణలు చెప్పాలని ఆదేశించింది. అధికార పార్టీ నేతలైతే అరెస్టులు చేయరా? అని ఢిల్లీ పోలీసులను ప్రశ్నించింది. మహమ్మద్‌ ప్రవక్తపై ఓ జాతీయ మీడియా ఛానల్‌ ఇంటర్వ్యూలో నూపుర్‌ ఇటీవల అనుచిత వ్యాఖ్యలు చేశారు. ఈ వ్యాఖ్యలను నిరసిస్తూ దేశవ్యాప్తంగా పలు ప్రాంతాల్లో ఆందోళనలు చెలరేగాయి.

అంతర్జాతీయంగా పలు దేశాలు నుపూర్‌ వ్యాఖ్యలను ఖండించాయి. ఆయా దేశాల్లోని భారత రాయబారులకు నోటీసులు పంపాయి. ఈ నేపథ్యంలో నష్టనివారణ చర్యలకు పూనుకొన్న బీజేపీ.. ఆమెను పార్టీ నుంచి సస్పెండ్‌ చేసింది. మరోవైపు, నూపుర్‌ వ్యాఖ్యలపై అభ్యంతరం వ్యక్తం చేస్తూ దేశంలో పలు చోట్ల కేసులు నమోదయ్యాయి. అయితే, తన ప్రాణాలకు ముప్పు పొంచి ఉన్నదని, తనపై వివిధ ప్రాంతాల్లో నమోదైన కేసులన్నింటినీ ఢిల్లీకి బదిలీ చేయాలంటూ నూపుర్‌ సుప్రీంకోర్టులో పిటిషన్‌ దాఖలు చేశారు. దీనిపై జస్టిస్‌ సూర్యకాంత్‌, జస్టిస్‌ జేబీ పార్దీవాలాతో కూడిన వెకేషన్‌ బెంచ్‌ శుక్రవారం విచారణ జరిపి.. పిటిషన్‌ను తోసిపుచ్చింది. కాగా, నూపుర్‌పై సుప్రీం వెకేషన్‌ బెంచ్‌ చేసిన వ్యాఖ్యలను ఉపసంహరించుకోవాలంటూ సీజేఐ జస్టిస్‌ ఎన్వీ రమణ నేతృత్వంలోని ధర్మాసనం ముందు ఓ పిటిషన్‌ దాఖలైంది. ఢిల్లీకి చెందిన హక్కుల కార్యకర్త అజయ్‌ గౌతమ్‌ ఈ పిటిషన్‌ వేశారు.

కోర్టు కీలక వ్యాఖ్యలు..

• నోటి దురుసుతో నూపుర్‌ దేశాన్ని అగ్నిగుండంగా మార్చారు. భావోద్వేగాలను రెచ్చగొట్టారు. ఆమె వ్యాఖ్యల అనంతరం దేశంలో దురదృష్టకరమైన ఘటనలు జరిగాయి. వాటన్నింటికీ ఆమెనే బాధ్యురాలు. ఉదయ్‌పూర్‌లో టైలర్‌ హత్య ఘటనకూ ఆమే కారణం. దేశంలో నిప్పు రాజేసినందుకు.. టీవీ ముందుకొచ్చి యావత్తు జాతికి ఆమె వెంటనే బహిరంగ క్షమాపణలు చెప్పాలి.
• పదేండ్లపాటు లాయర్‌గా పనిచేస్తున్నట్టు ఆమె గొప్పగా చెప్పుకుంటున్నారు. అలాంటి వ్యక్తి ఇలా మాట్లాడటమా?
• చీప్‌ పబ్లిసిటీ, రాజకీయ ఎజెండా లేదా కొన్ని నీచమైన కార్యకలాపాలను ప్రచారం చేయడానికే నూపుర్‌ ఈ అనుచిత వ్యాఖ్యలు చేసినట్టు కనిపిస్తున్నది.
• ఆమెకు ముప్పు పొంచి ఉన్నదని మీరు (న్యాయవాది) అంటున్నారు. అసలు ఆమే దేశ భద్రతకు ముప్పుగా మారారు కదా! టీవీలో జరిగిన చర్చ అంతా వీక్షించాం. ఆమె వ్యాఖ్యలు సిగ్గుచేటు.
• పార్టీ ప్రతినిధి అయితే ఇష్టానుసారంగా మాట్లాడుతారా? తన వెనుక అధికారం ఉన్నది కాబట్టి ఏం మాట్లాడినా చెల్లుబాటు అవుతుందని ఆమె అనుకుంటున్నారా?
• ఆమె పెట్టిన కేసుల్లో ఉన్న వ్యక్తులను వెంటనే అరెస్టు చేశారు. కానీ, ఆమెపై నమోదైన కేసుల్లో మాత్రం నూపుర్‌ను అరెస్టు చేయడానికి ఢిల్లీ పోలీసులు సాహసం చేయలేదు. ఎందుకు? అమెకు పలుకుబడి ఉన్నదనేనా?
• ప్రజాస్వామ్యంలో మాట్లాడే హక్కు ప్రతీ ఒక్కరికీ ఉంటుంది. ప్రజాస్వామ్యంలో పెరుగడానికి గడ్డికి హక్కు ఉన్నట్లే.. దాన్ని తినడానికి గాడిదకు కూడా హక్కు ఉన్నది.
• తన వ్యాఖ్యలపై ఆమె ఇప్పటికే క్షమాపణలు చెప్పారని మీరు (న్యాయవాది) అంటున్నారు. ఆ క్షమాపణలు ఆమె చాలా ఆలస్యంగా చెప్పారు. అది కూడా ఎవరి మనోభావాలైనా గాయపడితే అన్నట్టు షరతులకు లోబడి చెప్పారు.
• ప్రవక్తపై నూపుర్‌ వ్యాఖ్యలు ఆమె అహంకారాన్ని తెలియజేస్తున్నాయి. ఇలాంటి వ్యక్తులకు ఏ మతంపైనా గౌరవం ఉండదు. వెంటనే ఆమె దేశ ప్రజలకు క్షమాపణలు చెప్పాలి.

యాంకర్‌పై కూడా కేసు నమోదు చేయాల్సింది
డిబేట్‌లో భాగంగా టీవీ యాంకర్‌ అడిగిన ప్రశ్నకు మాత్రమే నూపుర్‌ సమాధానం చెప్పారని ఆమె తరఫు న్యాయవాది మణీందర్‌ సింగ్‌ ఈ సందర్భంగా కోర్టుకు తెలిపారు. అయితే, తాను ఈ వ్యాఖ్యలు చేయడానికి కారణమైన ఆ యాంకర్‌పై నూపుర్‌ కేసు పెట్టాల్సిందని న్యాయస్థానం సూచించింది. తన కేసులన్నింటినీ ఢిల్లీకి బదిలీచేయాలన్న నూపుర్‌ అభ్యర్థననూ తోసిపుచ్చిన ధర్మాసనం.. పిటిషన్‌ను వెనక్కితీసుకోవాలని ఆదేశించింది.

బీజేపీ సిగ్గుతో ఉరేసుకోవావి
విధ్వంసకర విభజన భావజాలానికి వ్యతిరేకంగా పోరాడుతున్న వారికి సుప్రీం తీర్పు మరింత బలాన్ని ఇచ్చింది. కోర్టు వ్యాఖ్యలతో బీజేపీ ఇప్పటికైనా సిగ్గుతో ఉరేసుకోవాలి.
– కాంగ్రెస్‌ ప్రధాన కార్యదర్శి జైరాం రమేశ్‌

వెంటనే అరెస్టు చేయాలి
మహమ్మద్‌ ప్రవక్తపై అనుచిత వ్యాఖ్యలు చేసిన నూపుర్‌ను వెంటనే అరెస్టు చేసి చట్టబద్ధమైన పాలన సాగించాలి.
– ఎంఐఎం చీఫ్‌ అసదుద్దీన్‌ ఒవైసీ

క్షమాపణలు చెప్పాలి
బాధ్యతాయుతమైన స్థానాల్లో ఉన్న నాయకులు ఇష్టారాజ్యంగా మాట్లాడకూడదు. సామరస్యంతో జీవిస్తున్న ప్రజల మధ్య వైషమ్యాలు రెచ్చగొట్టే ఇలాంటి మాటలు తగవు. ఇలాంటి ఘటనలు పునరావృతం కాకుండా చూడాల్సిన బాధ్యత కేంద్రంలోని బీజేపీదే. నూపుర్‌ వెంటనే దేశ ప్రజలకు క్షమాపణలు చెప్పాలి.
– సీపీఎం రాష్ట్ర కార్యదర్శి తమ్మినేని వీరభద్రం