Starlink : భారతదేశంలో స్టార్‌లింక్ ఇంటర్నెట్‌కు లైసెన్స్ : జ్యోతిరాదిత్య సింధియా

ఎలాన్ మస్క్ నేతృత్వంలోని స్టార్‌లింక్ భారతదేశంలో ఉపగ్రహ సేవల ఆధారిత ఇంటర్నెట్‌ను ప్రారంభించడానికి లైసెన్స్ పొందింది. స్పెక్ట్రమ్ కేటాయింపు సజావుగా అమలు చేయడానికి ఒక ఫ్రేమ్‌వర్క్ కూడా అమలులో ఉందని కేంద్ర టెలికాం శాఖ‌ మంత్రి జ్యోతిరాదిత్య సింధియా గురువారం తెలిపారు.

న్యూఢిల్లీ, జూలై 31 : ఎలాన్ మస్క్ నేతృత్వంలోని స్టార్‌లింక్ భారతదేశంలో ఉపగ్రహ సేవల ఆధారిత ఇంటర్నెట్‌ను ప్రారంభించడానికి లైసెన్స్ పొందింది. స్పెక్ట్రమ్ కేటాయింపు సజావుగా అమలు చేయడానికి ఒక ఫ్రేమ్‌వర్క్ కూడా అమలులో ఉందని కేంద్ర టెలికాం శాఖ‌ మంత్రి జ్యోతిరాదిత్య సింధియా గురువారం తెలిపారు. 1995లో దేశంలో మొట్టమొదటి సెల్యులార్ కాల్ చేసిన 30వ వార్షికోత్సవం సందర్భంగా ఈ ప్రకటన జరిగింది.

భారతదేశ డిజిటల్ పరివర్తన

గత 11 సంవత్సరాలుగా ప్రధానమంత్రి నరేంద్ర మోదీ నాయకత్వంలో భారతదేశం సాధించిన‌ డిజిటల్ వృద్ధిని సింధియా ఈ సంద‌ర్భంగా ప్ర‌స్తావించారు. మారుమూల గ్రామాల నుండి రద్దీగా ఉండే నగరాల వరకు, డిజిటల్ యాక్సెస్ పౌరులకు సాధికారత కల్పించింద‌ని, విభజనలను తగ్గించింద‌ని, సరసమైన, సమ్మిళిత సాంకేతికతలో భారతదేశాన్ని ప్రపంచ నాయకుడిగా మార్చింద‌ని ఆయన తెలిపారు. టెలిఫోన్ కనెక్షన్లు 1.2 బిలియన్లకు చేరుకున్నాయని, ఇంటర్నెట్ సబ్‌స్క్రిప్షన్లు 286 శాతం పెరిగి 970 మిలియన్లకు చేరుకున్న‌ట్లు చెప్పారు. బ్రాడ్‌బ్యాండ్ వినియోగం 1,450 శాతానికి పైగా వృద్ధిని సాధించింద‌న్నారు. ఇది 2014లో 60 మిలియన్ల నుండి నేడు 944 మిలియన్లకు పెరిగిన‌ట్లు చెప్పారు. ముఖ్యంగా మొబైల్ డేటా ధర 96.6 శాతం తగ్గింద‌ని, భారతదేశంలో GBకి కేవలం రూ. 8.9తో సరసమైన డేటాలో ప్రపంచ అగ్రగామిగా నిలిచింద‌న్నారు.

బీఎస్ఎన్ఎల్ పునరుద్ధరణ, 5G విస్తరణ

BSNL పునరుద్ధరణను ఒక పెద్ద ముందడుగుగా సింధియా అభివర్ణించారు. 18 సంవత్సరాలలో మొదటిసారిగా బీఎస్ఎన్ఎల్ 2024-25 ఆర్థిక సంవత్సరంలో వరుసగా రూ.262 కోట్లు, రూ.280 కోట్ల నికర లాభాలను నివేదించింద‌న్నారు. 83 వేల కంటే ఎక్కువ 4G సైట్‌లు స్థాపించబడ్డాయ‌ని, వాటిలో 74 వేలు ఇప్పటికే పనిచేస్తున్న‌ట్లు తెలిపారు. అన్నీ స్వదేశీంగా అభివృద్ధి చేయబడిన సాంకేతికతపై నిర్మించబడ్డ‌ట్లు ఆయ‌న వెల్ల‌డించారు.

భారతదేశం 5G రోల్అవుట్ 99.6 శాతం జిల్లాలను కవర్ చేసింద‌ని, 4.74 లక్షల టవర్లు అలాగే 300 మిలియన్ల వినియోగదారులతో. ప్రపంచంలో అత్యధిక తలసరి 5G వినియోగం (నెలకు 32 GB), 100 యూజ్ కేస్ ల్యాబ్‌లతో, 6G పేటెంట్ దాఖలులో భారతదేశం మొదటి ఆరు దేశాలలో ఒకటిగా ఉన్నట్లు సింధియా పేర్కొన్నారు. పీఎల్ఐ పథకం కింద పెట్టుబడులు రూ.4,305 కోట్లకు చేరుకున్నాయని, దీని వల్ల అమ్మకాలు రూ.85,391 కోట్లకు చేరాయని, 28 వేల కంటే ఎక్కువ ఉద్యోగాల క‌ల్ప‌న జ‌రిగిన‌ట్లు, ఎఫ్‌డీఐ దాదాపు మూడు రెట్లు పెరిగి 282 మిలియన్ల డాల‌ర్ల నుండి 710 మిలియన్ల డాల‌ర్ల‌కు పెరిగిందని ఆయ‌న పేర్కొన్నారు.