ప్రజ్వల్‌ రేవణ్ణకు యావజ్జీవ ఖైదు.. రేప్‌ కేసులో ప్రత్యేక కోర్టు తీర్పు

అత్యాచారం కేసులో మాజీ ప్రధాని మనవడు, మాజీ ఎంపీ, సస్పెన్షన్‌కు గురైన జేడీఎస్‌ నాయకుడు ప్రజ్వల్‌ రేవణ్ణకు ప్రత్యేక కోర్టు శనివారం యావజ్జీవ కారాగార శిక్ష విధించింది.

బెంగళూరు, ఆగస్టు 2: అత్యాచారం కేసులో మాజీ ప్రధాని మనవడు, మాజీ ఎంపీ, సస్పెన్షన్‌కు గురైన జేడీఎస్‌ నాయకుడు ప్రజ్వల్‌ రేవణ్ణకు ప్రత్యేక కోర్టు శనివారం యావజ్జీవ కారాగార శిక్ష విధించింది. ఆయనకు మరో రూ.10 లక్షల జరిమానా కూడా విధిస్తూ ఎంపీ/ఎమ్మెల్యేల ప్రత్యేక కోర్టు న్యాయమూర్తి సంతోష్‌ గజానన్‌ భట్‌ తీర్పు వెలువరించారు.

హసన్‌ జిల్లాలోని హోలెనరసీపురాలో ఉన్న రేవణ్ణ కుటుంబానికి చెందిన గన్నికడ వ్యవసాయక్షేత్రంలో పనిచేస్తున్న ఓ 48 ఏండ్ల మహిళపై జరిగిన అత్యాచారం కేసులో కోర్టు ఈ తీర్పు వెలువరించింది. తన పట్ల కనికరం చూపాలని రేవణ్ణ న్యాయమూర్తిని అర్థిస్తూ రోదించారు. కాగా, ఈ కేసును దర్యాప్తు చేసిన ప్రత్యేక దర్యాప్తు బృందం(సిట్‌) 2024 సెప్టెంబర్‌లో 1,632 పేజీలతో చార్జిషీట్‌ని దాఖలు చేసింది. మొత్తం 113 మంది సాక్షులను పేర్కొంది.