ఇండో-పసిఫిక్‌పై నియంత్రణకు కొన్ని దేశాల ప్రయత్నం: నేవీ చీఫ్

న్యూఢిల్లీ: ఇండో-పసిఫిక్‌ ప్రాంతంలో మరింత నియంత్రణ కోసం కొన్ని దేశాలు ప్రయత్నిస్తున్నాయని నేవీ చీఫ్ అడ్మిరల్ కరంబీర్ సింగ్ అన్నారు. పరోక్షంగా చైనా తీరును ప్రస్తావించారు. బుధవారం జరిగిన ఇండో-పసిఫిక్ రీజినల్ డైలాగ్ 2021లో ఆయన మాట్లాడారు. కొన్ని ఆమోదిత సమావేశాలు గ్లోబల్ కామన్స్‌ను వివాదాస్పద సముద్రాలుగా మారుస్తున్నాయని ఆరోపించారు. ఇండో-పసిఫిక్ ప్రాంతంలో ఎక్కువ ఆధిపత్యం, నియంత్రణ కోసం ప్రయత్నిస్తున్న కొన్ని దేశాలు భూ కేంద్రీకృత ప్రాదేశిక మనస్తతత్వాన్ని ప్రదర్శిస్తున్నాయని విమర్శించారు.

ప్రపంచ జనాభాలో 61 శాతం ఉన్న ఇండో-పసిఫిక్‌ ప్రాంతంలో నియంత్రణ, ప్రభావం, పరపతి, జియోస్ట్రాటజిక్ స్పేస్ కోసం రోజు రోజుకు పోటీ పెరుగుతున్నట్లుగా కనిపిస్తున్నదని నేవీ చీఫ్ అడ్మిరల్ కరంబీర్ సింగ్ అన్నారు. ప్రపంచ స్థూల జాతీయోత్పత్తి (GDP)లో 62 శాతం, ప్రపంచంలోని ద్వీప దేశాలలో 63 శాతం కలిగి ఉండటంతోపాటు దాదాపు 50 శాతం ప్రపంచ వాణిజ్యం ఇండో-పసిఫిక్ గుండా వెళ్లడమే దీనికి కారణమని అన్నారు. అందుకే ఈ ప్రాంతం లోపల, వెలుపల ఉన్న చాలా దేశాలు వాణిజ్యం కోసం దీనిని ఉచితంగా ఉంచడంలో ప్రధాన ఆసక్తిని కలిగి ఉన్నాయన్నారు.