Rohit Bhati | డైలాగ్స్ , యాక్టింగ్ వీడియోలతో సోషల్ మీడియాలో తనకంటూ ప్రత్యేక గుర్తింపు తెచ్చుకున్న రోహిత్ భాటి (రౌడీ భాటి) సోమవారం జరిగిన రోడ్డు ప్రమాదంలో మృతి చెందారు. ఈ ఘటన గ్రేటర్ నోయిడాలోని బీటా-2 పోలీస్ స్టేషన్ పరిధిలో గల చుహార్పూర్ అండర్పాస్ సమీపంలో చోటు చేసుకుంది. ఘనటకు సంబంధించి పోలీసు అధికారి అనిల్ కుమార్ తెలిపిన వివరాలు ఇలా ఉన్నాయి.
సోమవారం తెల్లవారుజామున 3గంటల ప్రాంతంలో ఓ పార్టీ నుంచి తిరిగి వస్తుండగా ఈ ప్రమాదం జరిగినట్లు తెలిపారు. అతివేగం కారణంగా కారు అదుపుతప్పి చెట్టును ఢీ కొట్టిందని.. ఈ ప్రమాదంలో డ్రైవర్ సీట్లో కూర్చున్న రోహిత్ అక్కడిక్కడే ప్రాణాలు కోల్పోయారని చెప్పారు. ప్రమాద సమయంలో రోహిత్తోపాటు తన స్నేహితులు ఇద్దరు కారులో ఉన్నారని.. వారు గాయాలతో బయటపడినట్లు వివరించారు. సమాచారం అందుకున్న పోలీసులు సంఘటనా స్థలానికి చేరుకుని మృతదేహాన్ని పోస్టుమార్టం నిమిత్తం స్థానిక ఆసుపత్రికి తరలించినట్లు పోలీసు అధికారి అనిల్ కుమార్ తెలిపారు. క్షతగాత్రులను చికిత్స నిమిత్తం గ్రేటర్ నోయిడా, ఢిల్లీలోని ఆస్పత్రుల్లో చేర్పించినట్లు వెల్లడించారు.