చిన్న జ్వరానికే యాంటిబయాటిక్స్‌ వద్దు

యాంటిబయాటిక్స్‌ వినియోగంపై ఇండియన్‌ కౌన్సిల్‌ ఆఫ్‌ మెడికల్‌ రిసెర్చ్‌(ఐసీఎంఆర్‌) కీలక సూచనలు చేసింది. చిన్నపాటి జ్వరం, వైరల్‌ శ్వాసనాళాల వాపు వంటి ఇతర పరిస్థితులకు యాంటిబయాటిక్స్‌ను సిఫారసు చేయొద్దని వైద్యులకు సూచించింది.

న్యూఢిల్లీ, నవంబర్‌ 27: యాంటిబయాటిక్స్‌ వినియోగంపై ఇండియన్‌ కౌన్సిల్‌ ఆఫ్‌ మెడికల్‌ రిసెర్చ్‌(ఐసీఎంఆర్‌) కీలక సూచనలు చేసింది. చిన్నపాటి జ్వరం, వైరల్‌ శ్వాసనాళాల వాపు వంటి ఇతర పరిస్థితులకు యాంటిబయాటిక్స్‌ను సిఫారసు చేయొద్దని వైద్యులకు సూచించింది. ఈ మేరకు ఐసీఎంఆర్‌ కొత్త మార్గదర్శకాలు విడుదల చేసింది. యాంటిబయాటిక్స్‌ సూచించేటప్పుడు ఓ కాలపరిమితి అనేది పాటించాలని తెలిపింది. యాంటిబయాటిక్స్‌ ఆపేసేందుకు తేదీని ముందుగానే నిర్ణయించాలని పేర్కొన్నది.

సామాజిక వ్యాప్తి న్యుమోనియాకు ఐదు రోజులు, దవాఖానలో వచ్చిన న్యుమోనియాకు 8 రోజులు.. చర్మం, మృదు కణజాల ఇన్ఫెక్షన్లకు ఐదు రోజుల యాంటిబయాటిక్‌ థెరపీని ఐసీఎంఆర్‌ సిఫారసు చేసింది. దేశవ్యాప్తంగా యాంటిబయాటిక్స్‌ రెసిస్టెన్స్‌లో ట్రెండ్‌ను గుర్తించడానికి ఐసీఎంఆర్‌ ఇటీవల ఓ సర్వే నిర్వహించింది. రక్తం, మూత్రనాళాలు, ఊపిరితిత్తుల్లో ఇన్ఫెక్షన్‌కు కారణమయ్యే గ్రామ్‌-నెగెటివ్‌ బ్యాక్టీరియా ‘అసినెటోబాక్టర్‌ భౌమన్ని’ అనేది ఎక్కువ పవర్‌ ఉండే యాంటిబయాటిక్స్‌పై అధిక నిరోధకత కలిగి ఉన్నట్టు గుర్తించారు. అసినెటోబాక్టర్‌ భౌమన్నికి చెందిన 87.5 శాంపిల్స్‌ హై ఎండ్‌ యాంటిబయాటిక్‌ కార్బపెనెమ్స్‌కు వ్యతిరేక నిరోధకత కలిగి ఉన్నాయని గతంలోనూ సర్వే కనుగొన్నది.