Gang robs women passengers | సిగ్నల్ ట్యాంపరింగ్‌తో రైలు నిలిపి.. మహిళా ప్రయాణికుల నుంచి బంగారం దోచుకున్న ముఠా

Gang robs women passengers | ఒక దొంగల ముఠా, రైల్వే సిగ్నల్‌ను ట్యాంపరింగ్‌ చేశారు. రైలు నిలిచిపోవడంతో ఒక స్లిపర్‌ కోచ్‌లోకి ప్రవేశించారు. మహిళా ప్రయాణికుల మెడలోని బంగారు ఆభరణాలను దోచుకున్నారు. ఆ తర్వాత రాళ్లు రువ్వి ప్రయాణికులను భయాందోళనకు గురిచేశారు.

ముంబై: ఒక దొంగల ముఠా, రైల్వే సిగ్నల్‌ను ట్యాంపరింగ్‌ చేశారు. రైలు నిలిచిపోవడంతో ఒక స్లిపర్‌ కోచ్‌లోకి ప్రవేశించారు. మహిళా ప్రయాణికుల మెడలోని బంగారు ఆభరణాలను దోచుకున్నారు. ఆ తర్వాత రాళ్లు రువ్వి ప్రయాణికులను భయాందోళనకు గురిచేశారు. (Gang robs women passengers) మహారాష్ట్రలోని సతారా జిల్లాలో ఈ సంఘటన జరిగింది. సోమవారం తెల్లవారుజామున 2.30 గంటల సమయంలో సుమారు పది మంది ఉన్న ఒక దొంగల ముఠా, సల్పా రైల్వే స్టేషన్ సమీపంలో సిగ్నలింగ్ వ్యవస్థను పాడు చేశారు. దీంతో ముంబై-కొల్హాపూర్ మహాలక్ష్మి ఎక్స్‌ప్రెస్ రైలు అక్కడ నిలిచిపోయింది.

కాగా, రైలు ఆగిన తర్వాత ఆ ముఠా ఎస్ 2 కోచ్‌లోకి ప్రవేశించారు. ముగ్గురు మహిళా ప్రయాణికుల నుంచి బంగారు ఆభరణాలను లాక్కొని పారిపోయారు. బాధిత ప్రయాణికులు తమను వెంబడించకుండా నిరోధించేందుకు ఎస్ 2, ఎస్ 3, ఎస్ 4 కోచ్‌లపై వారు రాళ్లు రువ్వారు. దీంతో ప్రయాణికులు భయాందోళన చెందారు.

మరోవైపు ఈ సమాచారం తెలుసుకున్న మీరాజ్ రైల్వే పోలీస్ స్టేషన్ పోలీసులు ఈ సంఘటనపై కేసు నమోదు చేసి దర్యాప్తు చేపట్టారు. ముగ్గురు మహిళా ప్రయాణికుల నుంచి రూ.2 లక్షల విలువైన బంగారు నగలను ఆ ముఠా దోచుకున్నట్లు రైల్వే పోలీస్‌ అధికారి తెలిపారు. నిందితులు రైల్వే సిగ్నల్ వ్యవస్థను ట్యాంపరింగ్‌ చేసి మహిళా ప్రయాణికులను లక్ష్యంగా చేసుకున్నట్లు తెలుస్తున్నదని చెప్పారు.

అయితే ఈ ముఠా బృందాలుగా విడిపోయారని, కొందరు రైల్వే సిగ్నల్ వ్యవస్థ సమీపంలో ఉండగా, మరికొందరు దోపిడీకి పాల్పడేందుకు రైలు కోచ్‌లోకి ఎక్కినట్లు రైల్వే పోలీస్‌ అధికారి అనుమానం వ్యక్తం చేశారు. ఆ దొంగల ముఠాను అరెస్ట్‌ చేసేందుకు పలు పోలీస్‌ బృందాలను ఏర్పాటు చేసినట్లు వివరించారు. ఈ సంఘటన నేపథ్యంలో రైళ్లలో భద్రత గురించి ప్రయాణికులు ఆందోళన చెందారు.