Visit:
న్యూఢిల్లీ, నవంబర్‌ 29: దేశ రాజధానిలో వాయు నాణ్యత సూచి(ఏక్యూఐ)కి వ్యతిరేకంగా కర్తవ్య పథ్‌లో నిరసన తెలియచేసిన ఆందోళనకారుల వీడియోలను స్వాధీనం చేసుకున్న ఢిల్లీ పోలీసులు ఆందోళనలో మావోయిస్టు నాయకుడు మడావి హిడ్మాకు మద్దతుగా కనిపించిన పోస్టర్లను గుర్తించారు. దర్యాప్తును విస్తరించే అవకాశం ఉందని ఢిల్లీ పోలీసులు శనివారం వెల్లడించారు. నిరసనకారులలో పలువురు నిషిద్ధ తీవ్రవాద గ్రూపులకు మద్దతు తెలియచేస్తున్న దృశ్యాలు వీడియోలో కనిపించడంతో ఈ నిరసనలో పాల్గొన్న సంస్థలపై తమ దర్యాప్తును కొత్తగా చేపట్టాల్సిన అవసరం ఉందని పోలీసులు భావిస్తున్నారు.
ఈ ఏడాది ప్రారంభంలో హైదరాబాద్‌లోని ఓ గదిలో సమావేశమైన భగత్‌సింగ్‌ స్టూడెంట్‌ ఏక్తా మంచ్‌కు చెందిన విద్యార్థుల వీడియో ఢిల్లీ పోలీసులకు లభించింది. ఆర్‌ఎస్‌యూకు మద్దతుగా ఈ విద్యార్థుల బృందం నినాదాలు చేయడం, పాటలు పాడటం వీడియోలో కనిపించింది. 2005లో ఆర్‌ఎస్‌యూను కేంద్రం నిషేధించింది. హైదరాబాద్‌ వీడియోలో కనిపించిన గుర్‌కిరత్‌, రవ్‌జోత్‌ అనే ఇద్దరు అక్కాచెల్లెళ్లు కర్తవ్య పథ్‌లో జరిగిన ఏక్యూఐ నిరసన ప్రదర్శన సందర్భంగా హిడ్మాకు అనుకూలంగా నినాదాలు చేయడాన్ని ఢిల్లీ పోలీసులు గుర్తించారు. అరెస్టయిన నిందితుల సోషల్‌ మీడియా అకౌంట్లను పోలీసులు పరిశీలిస్తున్నారు. నిందితుల వెనుక ఏదైనా పెద్ద నెట్‌వర్కేమైనా ఉందా అన్న కోణంలో పరిశోధన సాగుతోంది. దర్యాప్తు పురోగతి చెందితే మరిన్ని అరెస్టులు తప్పకపోవచ్చని వర్గాలు తెలిపాయి.
