న్యూఢిల్లీ: తమిళ సూపర్స్టార్ రజినీకాంత్కు ప్రధాని నరేంద్రమోదీ జన్మదిన శుభాకాంక్షలు తెలిపారు. తన అసాధారణ నటన, సృజనాత్మకతతో రజినీకాంత్ ఇకముందు కూడా ప్రజల్లో స్ఫూర్తి నింపుతూనే ఉండాలని ప్రధాని ఆకాంక్షించారు. ‘రజినీకాంత్ గారికి జన్మదిన శుభాకాంక్షలు. ఆయన ఇకముందు కూడా తన సృజనాత్మకత, అసాధారణ నటనతో ప్రజల్లో స్ఫూర్తి నింపాలని ఆకాంక్షిస్తున్నా’ అని ప్రధాని ట్వీట్ చేశారు. ‘నిండా నూరేళ్లు ఆయురారోగ్యాలతో నివసించేలా ఆయనకు భగవంతుడి ఆశీస్సులు ఉండాలని కోరుకుంటున్నా’ అని ట్విట్టర్లో పేర్కొన్నారు.
కాగా, రజినీకాంత్ 1950, డిసెంబర్ 12న జన్మించారు. ఆయనకు తల్లిదండ్రులు శివాజీరావు గైక్వాడ్ అనే పేరు పెట్టారు. అయితే తమిళ సినీపరిశ్రమకు చెందిన ప్రముఖ నిర్మాత కే బాలచందర్ ఆయనకు రజినీకాంత్ అని నామకరణం చేశారు. 1975లో బాలచందర్ అపూర్వ రాగంగల్ సినిమాను నిర్మించారు. ఈ సినిమా ద్వారా రజినీకాంత్ సినీరంగానికి పరిచయం అయ్యారు. ఆ సినిమాలో ఆయన సహనటుడి పాత్రలో నటించారు.