కృత్రిమ మేధతో ఉద్యోగాలకు ఎసరు..! గంటకు 24 మందిపై వేటు..!

ఆధునిక సాంకేతికతల్లో ఒకటైన కృత్రిమ మేధ (ఏఐ) ఏటా లక్షల ఉద్యోగాలకు ఎసరు పెడుతున్నది. ఈ సాంకేతికత వినియోగం నానాటికీ పెరుగుతుండటంతో ప్రపంచవ్యాప్తంగా టెక్‌ కంపెనీలు, స్టార్టప్‌లు ఉద్యోగులపై వేటు వేస్తున్నాయి.

• రెండేండ్లలో 4.25 లక్షల మంది టెకీలకు ఉద్వాసన

న్యూఢిల్లీ, డిసెంబర్‌ 26: ఆధునిక సాంకేతికతల్లో ఒకటైన కృత్రిమ మేధ (ఏఐ) ఏటా లక్షల ఉద్యోగాలకు ఎసరు పెడుతున్నది. ఈ సాంకేతికత వినియోగం నానాటికీ పెరుగుతుండటంతో ప్రపంచవ్యాప్తంగా టెక్‌ కంపెనీలు, స్టార్టప్‌లు ఉద్యోగులపై వేటు వేస్తున్నాయి. ప్రస్తుతం ప్రపంచవ్యాప్తంగా నెలకొన్న ఆర్థిక మందగమన పరిస్థితులను దృష్టిలో పెట్టుకుని ఖర్చులను తగ్గించుకునేందుకు ఉద్యోగులను తొలగిస్తున్నట్టు ఆయా కంపెనీలు చెప్తున్నాయి.

ఇలా గత రెండేండ్లలో (2023 డిసెంబర్‌ 26 వరకు) ప్రపంచవ్యాప్తంగా 4.25 లక్షల మందికిపైగా ఉద్యోగులు తొలగింపునకు గురయ్యారు. వీరిలో 36 వేల మందికిపైగా ఉద్యోగులు భారత్‌లోనే ఉద్వాసనకు గురైనట్టు స్పష్టమవుతున్నది. ఈ ఏడాది రిటైల్‌ టెక్‌, కన్జ్యూమర్‌ టెక్‌, ఫిన్‌టెక్‌ రంగాలకు చెందిన కంపెనీలు అధిక సంఖ్యలో ఉద్యోగులను తొలగించినట్టు ‘లేఆఫ్స్‌.ఎఫ్‌వైఐ’ వెబ్‌సైట్‌ వెల్లడించింది.

ఈ ఏడాది భారీగా ఉద్యోగులను తొలగించిన కంపెనీలు

• ఖర్చుల తగ్గింపు, వ్యాపార పునర్‌వ్యవస్థీకరణ ప్రక్రియలో భాగంగా ‘పేటీఎం’ సంస్థ 1,000 మందికిపైగా ఉద్యోగులను తొలగించింది.
• ప్రముఖ సామాజిక మాధ్యమం ‘షేర్‌చాట్‌’ 200 మంది ఉద్యోగులపై వేటు వేసింది. ఇది ఆ సంస్థ మొత్తం శ్రామికశక్తిలో దాదాపు 15 శాతానికి సమానం.
• గేమ్‌ స్ట్రీమింగ్‌ ప్లాట్‌ఫామ్‌ ‘లోకో’ తన మొత్తం 110 మంది ఉద్యోగుల్లో 40 మందిని (36 శాతం) తొలగించింది.
• టెక్‌ దిగ్గజం గూగుల్‌ ఆధ్వర్యంలోని ఎడ్‌టెక్‌ ప్లాట్‌ఫామ్‌ ‘అడ్డా 247’ దాదాపు 300 మంది ఉద్యోగులపై వేటు వేసింది.
• ఎడ్‌టెక్‌ దిగ్గజం ‘బైజూస్‌’ దాదాపు 5 వేల మంది ఉద్యోగులకు ఉద్వాసన పలికింది. దీంతో గత రెండేండ్లలో ఈ స్టార్టప్‌ తొలగించిన మొత్తం ఉద్యోగుల సంఖ్య 10 వేలు దాటింది.
• ఈ ఏడాది ఇప్పటికే రెండు విడతల్లో 400 మంది ఉద్యోగులపై వేటు వేసిన కిరాణా సరుకుల డెలివరీ సంస్థ ‘డంజో’ సెప్టెంబర్‌లో మరో 200 మంది వరకు ఉద్యోగులను తొలగించింది.

ఉద్యోగాల ఊచకోత

• ప్రపంచవ్యాప్తంగా ఉద్యోగాల ఊచకోత కొనసాగుతున్నది. ఏఐ వినియోగం పెరగడంతో టెకీలు ఉద్యోగాలు కోల్పోతున్నారు.
• గత రెండేండ్లలో ప్రపంచవ్యాప్తంగా ఉద్యోగాలు కోల్పోయిన టెక్‌ ఉద్యోగులు 4.25 లక్షల మంది
• భారత్‌లో ఉద్యోగాలు కోల్పోయినవారు 35 వేల మంది
• ఈ ఏడాది ఉద్యోగాలు కోల్పోయిన వారి సంఖ్య 2,60,771
• ఉద్యోగులను తొలగించిన కంపెనీల సంఖ్య 1,178
• గత రెండేండ్లలో సగటున రోజుకు ఉద్యోగాలు కోల్పోయిన వారు 582 మంది
• గత ఏడాది ఉద్యోగాలు కోల్పోయిన వారి సంఖ్య 1,64,769
• ఉద్యోగులను తొలగించిన కంపెనీల సంఖ్య 1,061