గురువారం 09 ఏప్రిల్ 2020
National - Mar 19, 2020 , 15:31:24

ఢిల్లీ ఎయిర్‌పోర్టులో కొత్త విధానంలో స్క్రీనింగ్‌

ఢిల్లీ ఎయిర్‌పోర్టులో కొత్త విధానంలో స్క్రీనింగ్‌

న్యూఢిల్లీ : కరోనా మహమ్మారి ప్రపంచాన్ని వణికిస్తోంది. ప్రపంచ దేశాల నుంచి మన దేశానికి వచ్చే ప్రయాణికులకు అన్ని ఎయిర్‌పోర్టుల్లో థర్మల్‌ స్క్రీనింగ్‌ నిర్వహిస్తున్న విషయం తెలిసిందే. అయితే ఢిల్లీలోని ఇందిరాగాంధీ అంతర్జాతీయ విమానాశ్రయంలో ప్రయాణికులకు నిర్వహించే స్క్రీనింగ్‌ విధానంలో స్వల్ప మార్పులు చేశారు. చైనా, దక్షిణ కొరియా, దుబాయి, కతార్‌, ఒమాన్‌, కువైట్‌ దేశాల నుంచి వచ్చే ప్రయాణికులకు 14 రోజుల క్వారంటైన్‌ను కేంద్రం తప్పనిసరి చేసింది. 

కొత్త విధానంలో స్క్రీనింగ్‌ చేసేందుకు ఐదుగురు సభ్యులతో కూడిన సహాయక బృందాన్ని ఏర్పాటు చేశారు. సీఐఎస్‌ఎఫ్‌ జవాను నేతృత్వం వహించే ఈ బృందంలో ఢిల్లీ ఎయిర్‌పోర్టు, విమానయాన సంస్థ, ఢిల్లీ పోలీసులకు చెందిన ఉద్యోగులు సభ్యులుగా ఉంటారు. ఈ బృందం 30 మంది ప్రయాణికులకు స్క్రీనింగ్‌ చేస్తుంది. ప్రయాణికులు స్క్రీనింగ్‌ను, క్వారంటైన్‌ను తప్పించుకోకుండా ఈ బృందం జాగ్రత్తలు తీసుకుంటుంది. అయితే విదేశాల నుంచి ప్రయాణికులందరికీ మొదట థర్మల్‌ స్క్రీనింగ్‌ చేస్తారు. కరోనా లక్షణాలు ఉన్న వారిని ఆస్పత్రికి, మిగిలిన వారిని ఇమ్మిగ్రేషన్‌ కౌంటర్లకు పంపిస్తారు. 

కరోనా లక్షణాలు ఉన్న వారిని హైరిస్క్‌, లోరిస్క్‌ కేటగిరీలుగా విభజిస్తారు. కరోనా సోకే అవకాశం ఉందని తేలితే అనుమానితులను తప్పకుండా 14 రోజుల క్వారంటైన్‌ చేస్తారు. ఈ కేటగిరిల్లో వచ్చిన వారు తమకు ప్రభుత్వ క్వారంటైన్‌ కావాలా? లేదా హోటల్‌ క్వారంటైన్‌ కావాలో తేల్చుకోవాలి. అయితే క్వారంటైన్‌ వ్యవధి పూర్తయిన తర్వాతనే వీరికి పాస్‌పోర్టు తిరిగి ఇస్తారు. తక్కువ ప్రమాదమున్న ప్రయాణికులు రెండు వారాలు హోం క్వారంటైన్‌ ఉండేలా అధికారులు సూచనలు ఇస్తారు. హోం క్వారంటైన్‌ ప్రయాణికులు తప్పనిసరిగా ఇంటికే పరిమితమై ఉంటామని, లేనిచో చట్టంప్రకారం తమపై చర్యలు తీసుకోవచ్చని ప్రమాణ పత్రం ఇవ్వాల్సి ఉంటుంది. 


logo