POCSO | స్కూల్‌లో పరిచయమై పెళ్లి పేరుతో మోసం.. పాపకు జన్మనిచ్చిన బాలిక.. యువకుడిపై పోక్సో కేసు

POCSO : మహారాష్ట్రలోని నాగ్‌పూర్‌లో దారుణం జరిగింది. 16 ఏళ్ల బాలిక పాపకు జన్మనిచ్చింది. ఈ ఘటనలో బాలికను పెళ్లి పేరుతో మోసం చేసిన యువకుడిపై పోక్సో కేసు నమోదైంది.

POCSO : మహారాష్ట్రలోని నాగ్‌పూర్‌లో దారుణం జరిగింది. 16 ఏళ్ల బాలిక పాపకు జన్మనిచ్చింది. ఈ ఘటనలో బాలికను పెళ్లి పేరుతో మోసం చేసిన యువకుడిపై పోక్సో కేసు నమోదైంది. ఈ ఘటనకు సంబంధించిన వివరాలివి. నాగ్‌పూర్ పరిధి, పంచ్‌పవోలిలో ఈ ఘటన జరిగింది. స్కూల్‌లో చదువుతున్న సమయంలో బాలికకు గత ఏడాది ఒక యువకుడు పరిచయమయ్యాడు.

తర్వాత బాలికను తన ఇంటికి రప్పించుకున్నాడు. గత ఏడాది ఆగష్టు 25న బాలిక అతడి ఇంటికి వెళ్లింది. అక్కడ బాలికపై లైంగిక చర్యకు పాల్పడ్డాడు. అంతేకాదు.. తనను పెళ్లి చేసుకుంటానని నమ్మించాడు. బాలిక మైనర్ అని తెలిసినప్పటికీ ఆ యువకుడు ఆమెతో సంబంధాన్ని కొనసాగించాడు. ఈ క్రమంలో కొంతకాలానికి బాలిక గర్భం దాల్చింది. ఇటీవల ఆ బాలిక ఒక పాపకు జన్మనిచ్చింది. ఇప్పుడు బాలిక వయసు 16 సంవత్సరాలు. నిందితుడి వయసు 18. బాలిక పాపకు జన్మనివ్వడంతో ఈ విషయం సంచలనంగా మారింది.

ఈ నేపథ్యంలో బాలిక కుటుంబం.. ఆ బాలుడిపై ఫిర్యాదు చేసింది. స్పందించిన పంచ్‌పౌలి పోలీసులు నిందితుడిపై పోక్సో యాక్ట్ కింద కేసు నమోదు చేశారు. ప్రస్తుతం కేసు విచారణ సాగుతోందని, నిందితుడిపై కఠిన చర్యలు తీసుకుంటామని పోలీసులు తెలిపారు.