ముంబైలో కొత్తగా 32 మీజిల్స్‌ కేసులు.. 1.34 లక్షల మంది చిన్నారులకు వ్యాక్సిన్‌

Mumbai | ముంబైలో మీజిల్స్‌ వైరస్‌ రోజురోజుకూ తీవ్రరూపం దాలుస్తున్నది. మరో 32 మంది చిన్నారులకు వైరస్‌ సోకిందని బ్రిహిన్‌ముంబై మున్సిపల్‌ కార్పొరేషన్‌ (BMC) తెలిపింది. దీంతో మొత్తం కేసులు

ముంబై: ముంబైలో మీజిల్స్‌ వైరస్‌ రోజురోజుకూ తీవ్రరూపం దాలుస్తున్నది. మరో 32 మంది చిన్నారులకు వైరస్‌ సోకిందని బ్రిహిన్‌ముంబై మున్సిపల్‌ కార్పొరేషన్‌ (BMC) తెలిపింది. దీంతో మొత్తం కేసులు 300కి చేరువయ్యాయి. వీటిలో గత రెండు నెలల్లోనే 2 వందల కేసులు నమోదయ్యాయి. గతకొన్నేండ్లలో ఈ స్థాయిలో కేసులు నమోదవడం ఇదే మొదటిసారి. గురువారం మధ్యాహ్నం గోవండీలోని మురికివాడలో నివాసముంటున్న ఓ 8 నెలల బాలుడు కన్నుమూశాడు. దీంతో మీజిల్స్‌తో నగరంలో మొత్తం 13 మంది చిన్నారులు మృతిచెందారు.

బీఎంసీ పరిధిలోని ముంబై, మాలేగావ్‌, భీవాండీ, థాణే, నాసిక్‌, అకోలా, కళ్యాణ్‌ తదితర ప్రాంతాల్లో ఈ తరహా కేసులు రికార్డవుతున్నాయి. దీంతో ఆరోగ్య సిబ్బంది బైకళా, వర్లీ, వడాల, ధారావి, బాంద్రా, అంధేరీ, మలాడ్‌, గోవండీ, చెంబూర్‌, కుర్లా, భాండూప్‌ తదితర ప్రాంతాల్లో వ్యాక్సినేషన్‌ చేస్తున్నారు. మొత్తం 1,34,833 మంది 9 నెలల నుంచి 5 ఏండ్ల మధ్య వయస్సున్న చిన్నారులకు మీజిల్స్‌-రుబెల్లా స్పెషల్‌ డోసులను పంపిణీ చేస్తున్నారు. దేశంలో మహారాష్ట్రతోపాటు బీహార్‌, గుజరాత్‌, హర్యానా, జార్ఖండ్‌, కేరళలోనూ మీజిల్స్‌ కేసులు నమోదవుతున్నాయి.