రైలు రావట్లే.. రోడ్డు పడట్లే!

గత 9 ఏండ్లలో కేంద్రంలోని బీజేపీ ప్రభుత్వం చేపట్టిన మౌలిక వసతుల కల్పన వల్ల తెలంగాణ ప్రభుత్వం కూడా గొప్పగా లాభపడిందని గత శనివారం హైదరాబాద్‌కు వచ్చిన ప్రధానమంత్రి నరేంద్రమోదీ పరేడ్‌గ్రౌండ్‌ సభలో సెలవిచ్చారు.

• కేంద్ర ప్రాజెక్టుల్లో పనులన్నీ జాప్యం
• నత్తనడకన 407 రోడ్డు నిర్మాణ ప్రాజెక్టులు
• రెండో స్థానంలో 114 పనులతో రైల్వేస్‌
• పెట్రోలియం విభాగంలోనూ 86 పెండింగే
• ఆలస్యంలో టాప్‌ మహబూబ్‌నగర్‌ రైల్వే లైనే
• కేంద్ర ప్రభుత్వ నివేదికలో వెల్లడి

న్యూఢిల్లీ, ఏప్రిల్‌ 11: గత 9 ఏండ్లలో కేంద్రంలోని బీజేపీ ప్రభుత్వం చేపట్టిన మౌలిక వసతుల కల్పన వల్ల తెలంగాణ ప్రభుత్వం కూడా గొప్పగా లాభపడిందని గత శనివారం హైదరాబాద్‌కు వచ్చిన ప్రధానమంత్రి నరేంద్రమోదీ పరేడ్‌గ్రౌండ్‌ సభలో సెలవిచ్చారు. తాము అధికారంలోకి వచ్చాకే దేశంలో రోడ్లు వచ్చాయి, రైళ్లు వచ్చాయి అన్నంతగా డబ్బా కొట్టుకొన్నారు. కానీ, ఆయన ప్రభుత్వమే విడుదల చేసిన నివేదిక మౌలిక వసతుల కల్పన ప్రాజెక్టుల దుస్థితిని ప్రజలముందు ఉంచింది.

దేశవ్యాప్తంగా కేంద్ర ప్రభుత్వం చేపట్టిన మౌలిక వసతుల ప్రాజెక్టుల్లో ఏకంగా 717 ప్రాజెక్టులు నత్తతో పోటీపడి నడుస్తున్నాయని ఫిబ్రవరిలో విడుదలైన ఫ్లాష్‌ రిపోర్టు స్పష్టంచేసింది. ఇందులో రోడ్లు, జాతీయ రహదారుల ప్రాజెక్టులు 407, రైల్వే ప్రాజెక్టులు 114, పెట్రోలియం పరిశ్రమకు సంబంధించినవి 86 ప్రాజెక్టులు ఎప్పుడు పూర్తవుతాయో కూడా తెలియని పరిస్థితి ఉన్నదని రిపోర్టును బట్టి తెలుస్తున్నది. కనీసం రూ.150 కోట్ల అంచనా వ్యయానికి మించిన 1,418 ప్రాజెక్టుల పనులను ఈ పరిశీలించి ఈ నివేదికను రూపొందించారు. వీటిలో సగానికి పైగా అంటే 717 ప్రాజెక్టుల పనులు ఎక్కడ వేసిన గొంగడి అక్కడే అన్నట్టుగా ఉన్నాయని తేలింది.

వ్యయం తడిసి మోపెడు
పనులు ఎక్కడివక్కడే ఆగిపోవటంతో వాటి అంచనా వ్యయం అమాంతం పెరిగిపోయి తడిసి మోపెడవుతున్నది. మౌలిక వసతుల ప్రాజెక్టులను ప్రారంభించినప్పుడు మొత్తం అంచనా వ్యయం రూ.3.97 లక్షల కోట్లుగా అంచనా వేయగా, ప్రస్తుతం అది రూ.4.14 లక్షల కోట్లకు పెరిగిందని నివేదికలో తెలిపారు. అంటే పనుల ఆలస్యం వల్ల అంచనా వ్యయం 4.3 శాతం పెరిగింది. మరీ దరిద్రం ఏమంటే రైల్వేశాఖ చేపట్టిన మొత్తం 173 ప్రాజెక్టుల్లో ఏకంగా 114 ప్రాజెక్టుల పనులు ఒక అడుగు ముందుకు రెండడుగులు వెనక్కి అన్నట్టుగా సాగుతున్నాయి. దీంతో వీటి అంచనా వ్యయం ఏకంగా 68.1 శాతం పెరగటం గమనార్హం. 173 ప్రాజెక్టులను చేపట్టినప్పుడు వాటి మొత్తం అంచనా వ్యయం రూ.3.72 లక్షల కోట్లుగా అంచనా వేశారు.

ప్రస్తుతం వాటి అంచనా వ్యయం రూ.6.26 లక్షల కోట్లకు పెరిగిందని నివేదికలో తేల్చారు. ఇక పెట్రోలియం శాఖ రూ.3.67 లక్షల కోట్లతో 146 ప్రాజెక్టులు చేపట్టింది. వీటి ప్రస్తుత అంచనా వ్యయం 4.8 శాతం పెరిగి రూ.3.85 లక్షల కోట్లకు చేరింది. ఈ మొత్తం ప్రాజెక్టుల్లో 86 పనులు ముక్కుతూ మూలుగుతూ సాగుతున్నాయి.

ఇదీ ప్రాజెక్టుల పరిస్థితి

• కేంద్రప్రభుత్వం చేపట్టే రూ.150 కోట్ల వ్యయానికి మించిన ప్రాజెక్టులను కేంద్ర స్టాటిస్టిక్స్‌ అండ్‌ ప్రోగ్రామ్‌ ఇంప్లిమెంటేషన్‌ శాఖ పరిధిలోని ది ఇన్‌ఫ్రాస్ట్రక్చర్‌ అండ్‌ ప్రాజెక్ట్‌ మానిటరింగ్‌ డివిజన్‌ పర్యవేక్షిస్తుంది. ఈ నివేదికను కూడా ఆ సంస్థే విడుదల చేసింది.
• నివేదిక ప్రకారం కేంద్రం చేపట్టిన 823 ప్రాజెక్టుల పనులు షెడ్యూల్‌కంటే ఆలస్యంగా నడుస్తున్నాయి.
• 346 ప్రాజెక్టుల వ్యయం అంచనాను మించిపోయింది.
• 242 ప్రాజెక్టులకు సంబంధించి వ్యయం, పూర్తిచేయాల్సిన సమయం కూడా మించిపోయింది.
• 159 ప్రాజెక్టుల పనులు మరీ ఆలస్యంగా సాగుతున్నాయి. వీటిలో రూ.1,000 కోట్ల అంచనా వ్యయానికి మించిన మెగా ప్రాజెక్టులు 38 ఉన్నాయి.
• మొత్తం ప్రాజెక్టుల్లో అత్యంత ఆలస్యంగా నడుస్తున్నది మునీరాబాద్‌-మహబూబ్‌నగర్‌ రైల్వే లైన్‌ ప్రాజెక్టు. ఇది 276 నెలలు ఆలస్యంగా సాగుతున్నది.
• రూ.150 కోట్ల అంచనా వ్యయానికి మించిన ప్రాజెక్టులు 1,418
• వీటిలో ఆలస్యంగా సాగుతున్నవి 717
• ఆలస్యంగా సాగుతున్న మౌలిక వసతుల ప్రాజెక్టులు 407
• ఆలస్యంగా సాగుతున్న రైల్వే ప్రాజెక్టులు 114
• ఆలస్యంగా సాగుతున్న పెట్రోలియం ప్రాజెక్టులు 86