Corbevax: కేంద్ర ఆరోగ్య‌శాఖ మంత్రిని క‌లిసిన బ‌యోలాజిక‌ల్-ఈ సంస్థ ఎండీ

న్యూఢిల్లీ: హైద‌రాబాద్‌కు చెందిన బ‌యోలాజిక‌ల్ ఈ వ్యాక్సిన్ సంస్థ‌.. కోవిడ్ కోసం కోర్బ్‌వ్యాక్స్ ( Corbevax) టీకాల‌ను త‌యారు చేస్తున్న‌ది. ప్ర‌స్తుతం కోర్బ్‌వ్యాక్స్ టీకాల పురోగ‌తి వేగంగా జ‌రుగుతున్న‌ట్లు ఆ కంపెనీ ఎండీ మ‌హిమా ధాట్ల తెలిపారు. ఈ నేప‌థ్యంలో ఆమె ఇవాళ కేంద్ర ఆరోగ్య‌శాక మంత్రి మ‌న్సూక్ మాండ‌వీయ‌ను క‌లిశారు. బ‌యోలాజిక‌ల్-ఈ సంస్థ ఎండీ మ‌హిమ ఇవాళ త‌న‌ను క‌లిసిన‌ట్లు మంత్రి మాండ‌వీయ త‌న ట్విట్ట‌ర్‌లో తెలిపారు. వ్యాక్సిన్ ఉత్ప‌త్తి కోసం బీఈ సంస్థ‌కు పూర్తి స‌హ‌కారాన్ని అందించ‌నున్న‌ట్లు మంత్రి హామీ ఇచ్చారు.

Met Ms Mahima Datla, MD of @Biological_E, who briefed me on the progress of their upcoming #COVID19 vaccine, Corbevax.
I assured all the Government support for the vaccine. pic.twitter.com/QzRohNalhe

— Dr Mansukh Mandaviya (@mansukhmandviya) August 6, 2021

అమెరికాకు చెందిన బేయ‌ర్ కాలేజీ ఆఫ్ మెడిసిన్‌తో క‌లిసి బీఈ సంస్థ కోర్బ్‌వ్యాక్స్ టీకాల‌పై ట్ర‌య‌ల్స్ నిర్వ‌హించింది. కోర్బ్‌వ్యాక్స్ ఓ ప్రోటీన్ స‌బ్‌యూనిట్ వ్యాక్సిన్‌. ఇది సాధార‌ణంగా వ్యాక్సిన్ల త‌యారీకి వాడే టెక్నాల‌జీతో రూపొందిస్తున్నారు. హెపిటైటిస్ బీ, హెచ్‌పీవీ వ్యాక్సిన్ల‌కు ఇదే టెక్నాల‌జీ వాడుతుంటారు.

జూన్ 3వ తేదీన బ‌యోలాజిక‌ల్ ఈ సంస్థ‌తో కేంద్ర ప్ర‌భుత్వం ఓ ఒప్పందం కుదుర్చుకున్న‌ది. ఆ డీల్ ప్ర‌కారం ఈ ఏడాది ఆగ‌స్టు నుంచి డిసెంబ‌ర్ వ‌ర‌కు ఆ సంస్థ సుమారు 30 కోట్ల‌ వ్యాక్సిన్ల‌ను ఉత్ప‌త్తి చేయ‌నున్న‌ది. ప్ర‌పంచ‌వ్యాప్తంగా వ్యాక్సిన్ల పంపిణీ కోసం ఏర్పాటు చేసిన గ‌విలో మ‌హిమ ధాట్ల స‌భ్యురాలు.