హిందుత్వ అంటే ‘ఫెయిర్ అండ్ లవ్లీ క్రీమ్’ కాదు: కన్నయ్య కుమార్‌

వాట్సాప్‌లో వస్తువన్నీ సున్నితమైన, కఠినమైన హిందుత్వమని కన్నయ్య వ్యాఖ్యానించారు. ‘విషం విషమే. చిన్న పాము కూడా పెద్ద పాములా విషపూరితమైనదే’ అని అన్నారు.

ముంబై: హిందుత్వ అంటే ‘ఫెయిర్ అండ్ లవ్లీ క్రీమ్’ కాదని కాంగ్రెస్‌ నాయకుడు కన్నయ్య కుమార్‌ అన్నారు. చలికాలం రాగానే పెదాలకు వేరే క్రీమ్, పాదాలకు మరో క్రీమ్ వస్తుందని వ్యాఖ్యానించారు. మహారాష్ట్రలోని నాందేడ్‌లో రాహుల్‌ గాంధీ చేపట్టిన భారత్‌ జోడో యాత్రలో పాల్గొన్న కన్నయ్య కుమార్‌ మీడియాతో మాట్లాడారు. ఈ సందర్భంగా హిందుత్వ అంశాన్ని ప్రస్తావించారు. హిందుత్వ అనేది సరైన సిద్ధాంతం, రాజకీయ సిద్ధాంతం అని తెలిపారు. మహారాష్ట్రలో జన్మించిన సావర్కర్‌ను చదివితే మీకు ఇది అర్థమవుతుందని అన్నారు.

వాట్సాప్‌లో వస్తువన్నీ సున్నితమైన, కఠినమైన హిందుత్వమని కన్నయ్య వ్యాఖ్యానించారు. ‘విషం విషమే. చిన్న పాము కూడా పెద్ద పాములా విషపూరితమైనదే’ అని అన్నారు. దయచేసి హిందూ మతాన్ని అవమానించవద్దని కోరారు. ‘మతం పేరు చెప్పి ప్రజలను ఇరకాటంలో పెట్టే ఆలోచనా విధానమేదీ మతం కాదు. ఎందుకంటే ఏ మతమైనా మానవ మనస్సుకు విముక్తి కలిగించడమే’ అని అన్నారు.

భారత్‌ జోడో యాత్రలో భాగంగా రాహుల్‌ గాంధీ ఆలయాలను సందర్శించడంపై ప్రశ్నించిన రిపోర్టర్‌కు కన్నయ్య కుమార్‌ కౌంటర్ ఇచ్చారు. మీ కళ్లద్దాల పవర్‌ ఎంత? అని ఆ రిపోర్ట్‌ను అడిగారు. తాను ఎగతాళి కోసం ఆ ప్రశ్నను అడగలేదన్నారు. కంటిచూపు సమస్య మాదిరిగానే ఈ రోజుల్లో మన అవగాహన కూడా కలుషితమైందని, తద్వారా మనం సత్యాన్ని చూడలేకపోతున్నామని వ్యాఖ్యానించారు. తాను కేరళలోని ఒక దేవాలయానికి వెళ్ళినప్పుడు ప్రజలంతా దాని గురించి మాట్లాడారని, అయితే తాను గురుద్వారాను సందర్శించినప్పుడు ఎవరూ ఏమీ అనలేదని గుర్తు చేశారు. భారతదేశ రాజకీయ చర్చ అక్షాంశం ఇదే అన్న ఆయన ఈ ప్రశ్న ఎక్కడ నుంచి వస్తుందని నిలదీశారు.

కాగా, రాహుల్ గాంధీ దేవాలయాలతోపాటు చర్చిలు, మసీదులను కూడా సందర్శించినట్లు కన్నయ్య తెలిపారు. యాత్రలో భాగంగా పాఠశాలలు, కళాశాలలు, కర్మాగారాలకు ఆయన వెళ్లారని అన్నారు. ‘ఈ ప్రదేశాలన్నీ పవిత్రమైనవి. మేం ప్రయాణికులం. మా రహదారి కూడా మాకు చాలా పవిత్రమైనది’ అని వ్యాఖ్యానించారు.

మరోవైపు హిందువులు, ముస్లింలు సహజీవనం చేయలేరని ముస్లిం లీగ్‌తోపాటు హిందూ మహాసభ కూడా చెప్పిందని కన్నయ్య గుర్తు చేశారు. మరి ఇరు వర్గాల కూటమి ఎలా ఏర్పడింది? అని ప్రశ్నించారు. మత ప్రాతిపదికన రాజకీయాలు చేసే వ్యక్తుల ప్రసంగాలు వింటుంటే, ప్రధాని మోదీ చెప్పింది కూడా నిజమే అనిపిస్తుందని ఎద్దేవా చేశారు. ‘వేషధారణ ఒక్కటే తేడా. అంతా విషమే. ప్రజలను ఇలాగే విభజిస్తున్నారు. మేం ఈ ఉచ్చులో పడబోం’ అని కన్నయ్య కుమార్‌ అన్నారు.