Visit:
మ‌హేంద్ర‌గిరి: ఇస్రో బుధ‌వారం రోజున కీల‌క ప‌రీక్ష నిర్వ‌హించింది. వ్యోమ‌గాముల‌ను అంత‌రిక్షంలోకి పంపేందుకు ఇస్రో సిద్ధ‌మ‌వుతున్న విష‌యం తెలిసిందే. దీని కోసం గ‌గ‌న్‌యాన్ ప్రాజెక్టును చేప‌ట్టింది. అయితే ఆ ప్రాజెక్టుకు సంబంధించిన క్ర‌యోజెనిక్ ఇంజిన్ క్వాలిఫికేష‌న్ టెస్టును బుధ‌వారం నిర్వ‌హించింది. త‌మిళ‌నాడులోని మ‌హేంద్ర‌గిరిలో ఉన్న ఇస్రో ప్రొప‌ల్ష‌న్ కాంప్లెక్స్‌లో ఆ ప‌రీక్ష జ‌రిగింది. సుమారు 720 సెక‌న్ల పాటు ఆ ప‌రీక్ష చేప‌ట్టారు. ఆ క్వాలిఫికేష‌న్ టెస్ట్ విజ‌య‌వంత‌మైన‌ట్లు ఇస్రో వెల్ల‌డించింది. టెస్ట్ ల‌క్ష్యాల‌ను అందుకునేందుకు ఇంజిన్‌కు ప‌రీక్ష నిర్వ‌హించారు. అయితే ఇంజిన్ ప‌ర్ఫార్మెన్స్ బాగున్న‌ట్లు ఇస్రో తెలిపింది. టెస్ట్ స‌మ‌యంలో ఇంజిన్ పారామీట‌ర్లు అన్నీ అందుకున్నాయి. హ్యూమ‌న్ స్పేస్ ప్రోగ్రామ్ గ‌గ‌న్‌యాన్‌లో ఈ ప‌రీక్ష కీల‌క‌మ‌ని ఇస్రో వెల్ల‌డించింది. అతి సుదీర్ఘ‌కాలం నిర్వ‌హించిన ఈ టెస్టు ఓ మైలురాయి అవుతుంద‌ని ఇస్రో చెప్పింది. క్ర‌యోజెనిక్ ఇంజిన్ సామ‌ర్ధ్యాన్ని అన్ని కోణాల్లో ప‌రీక్షించిన‌ట్లు ఇస్రో తెలిపింది. అయితే ఇలాగే మ‌రో నాలుగు సార్లు ఆ ఇంజిన్‌కు ప‌రీక్ష‌లు చేప‌ట్ట‌నున్న‌ట్లు వెల్ల‌డించారు. సుమారు 1810 సెక‌న్ల పాటు క్ర‌యోజెనిక్ ఇంజిన్‌ను టెస్ట్ చేస్తారు. గ‌గ‌న్‌యాన్ క్వాలిఫికేష‌న్ ప్రోగ్రామ్ కోసం మ‌రిన్ని ప‌రీక్ష‌లు కూడా నిర్వ‌హించ‌నున్న‌ట్లు ఇస్రో తెలిపింది.
