Sonia Gandhi: ఇందిరా గాంధీ కోపం.. కుర్చీలో వ‌ణికిపోయేదాన్ని : సోనియా గాంధీ

Sonia Gandhi: ఇందిరా గాంధీ కోపం త‌న‌కు వ‌ణుకుపుట్టించేద‌ని సోనియా గాంధీ త‌న ఆత్మ‌క‌థ బుక్‌లో రాశారు. ఇందిర కోపానికి సిబ్బంది అయినా, నేత‌లైనా స్తంభించిపోయేవార‌ని పేర్కొన్నారు. ఓసారి డైనింగ్ టేబుల్‌పై భోజ‌న ప‌ల్లాన్ని కోపంతో విసిరేసిన‌ట్లు గుర్తు చేశారు.

న్యూఢిల్లీ: బిలాంగింగ్‌: ఎ జ‌ర్నీ ఆఫ్ ల‌వ్ బుక్‌లో సోనియా గాంధీ(Sonia Gandhi) త‌న అత్త ఇందిరా గాంధీ గురించి రాశారు. ఇందిరా గాంధీకి కోపం వ‌స్తే, తాను కుర్చీలో వ‌ణికిపోయేదాన్ని అని పేర్కొన్నారు. ఇందిర ఎంత స్థిర‌మైన వ్య‌క్తో ఆమె టెంప‌ర్ ద్వారా తెలిసేద‌న్నారు. నెహ్రూ-గాంధీ కుటుంబంలో కొత్త‌గా అడుగుపెట్టిన రోజుల్లో జ‌రిగిన కొన్ని ఘ‌ట‌న‌ల గురించి సోనియా త‌న బుక్‌లో వెల్ల‌డించారు. మాజీ ప్ర‌ధాని ఇందిరా గాంధీకి కోపం ఎక్కువ‌న్నారు. ఇందిర ఆవేశాన్ని ప్ర‌ద‌ర్శిస్తే, అక్క‌డ ఉన్న అంద‌రూ వ‌ణికిపోయేవార‌ని సోనియా గుర్తు చేశారు. 544 పేజీల బుక్‌లో ఇందిర గురించి సోనియా అనేక అంశాల‌ను తెలిపారు. అత్త ఇందిర అక‌స్మాత్తుగా కొన్ని సంద‌ర్భాల్లో అరిచేద‌ని, ఆ స‌మ‌యంలో తాను కూడా వ‌ణికిపోయేదాన్ని అని సోనియా త‌న బుక్‌లో తెలిపారు. ఆ స‌మ‌యంలో అక్క‌డ ఉన్న సిబ్బంది కూడా స్తంభించిపోయేవార‌న్నారు. ముఖ్య‌మైన అపాయింట్‌మెంట్ గురించి గుర్తు చేయ‌ని ఓ సిబ్బందిని రూమ్‌లో ఓ కార్న‌ర్‌లో నిల్చోబెట్టిన‌ట్లు ఇందిర గురించి సోనియా తెలిపారు. కుర్తా దోతీ ధ‌రించిన ఓ వ్య‌క్తి కూడా ఓ సంద‌ర్భంలో రూమ్‌లో రోజంతా నిల‌బ‌డిన‌ట్లు ఆమె రాశారు.

ఇందిర గాంధీ సిబ్బందిలో ఉన్న సీనియ‌ర్ స‌భ్యురాలు ఆమీ ఆంటీతో రోజూ అర‌గంట గ‌డిపిన‌ట్లు సోనియా బుక్‌లో రాశారు. అత్త చెప్పిన‌ట్లు ఓ సీనియ‌ర్ నాయ‌కుడు రూమ్‌లో గోడ‌కు అతుక్కుపోయిన‌ట్లు సోనియా గుర్తు చేశారు. త‌న అయిష్టాన్ని ఇందిర వ్య‌క్తం చేసే విధానం భిన్న‌మైంద‌న్నారు. అలాంటి వ్య‌క్తుల‌ను అస‌లు ప‌ట్టించుకునేది కాద‌న్నారు. భోజ‌నం చేస్తున్న స‌మ‌యంలో కూడా ఇందిరా గాంధీ కొన్ని సంద‌ర్భాల్లో ఆవేశానికి లోన‌య్యేవార‌ని రాశారు. పార్ల‌మెంట్‌లో ఏదైనా ఘాటు సంద‌ర్భం ఏర్ప‌డిన రోజు డైనింగ్ టేబుల్ మీద కూడా ఇందిర కోపంగా ఉండేద‌న్నారు. ఓసారి అత్త ఇందిర భోజ‌న ప‌ల్లెంను డైనింగ్ టేబుల్‌పై విసిరేసిన‌ట్లు సోనియా తెలిపారు.

మొద‌ట్లో ఇందిర ఆవేశం త‌న‌ను ఇబ్బందిపెట్టేద‌న్నారు. త‌న తండ్రి టెంప‌ర్‌ను గుర్తు చేసేద‌న్నారు. కొన్ని సంద‌ర్భాల్లో చ‌లించేదాన్ని అని, వ‌ణికిపోయేదాన్ని అని రాశారు. ఆ స‌మ‌యంలో రాజీవ్ గాంధీతో పాటు సంజ‌య్ కూడా మౌనంగా కూర్చునేవాళ్లు అని రాశారు. ఆ క్ష‌ణం గ‌డిసిపోయే వ‌ర‌కు ఎదురుచూసేవార‌న్నారు. భ‌య‌ప‌డ‌వ‌ద్దు అని రాజీవ్ త‌న‌కు ధైర్యం చెప్పేవార‌ని, కొంత స‌మ‌యంలో త‌ల్లి మ‌ళ్లీ సాధార‌ణ స్థాయికి వ‌స్తుంద‌నేవారు. ఇందిర గురించి పూర్తిగా తెలుసుకునే వ‌ర‌కు.. సీటులో కూర్చున్నా వ‌ణికిపోయేదాన్ని అని సోనియా త‌న బుక్‌లో రాశారు. ఒక‌వేళ ఇందిర ఆవేశానికి లోనైనా, ఆ త‌ర్వాత ఆమె ప‌శ్చాతాపం వ్య‌క్తం చేసేద‌ని సోనియా తెలిపారు. కానీ త‌న న‌మ్మ‌కాన్ని వ‌మ్ము చేసిన వారిని మాత్రం అస‌లు క్ష‌మించేదికాద‌న్నారు. ఆ వ్య‌క్తిని ఇందిర ఎప్ప‌టికీ దూరం చేసుకునేద‌ని సోనియా గుర్తు చేశారు.

పాత ఫోటోలు, చీర‌లు, క‌శ్మీరీ శాలువ‌ల‌ను ఇందిరా గాంధీ ఎక్కువ‌గా ఇష్ట‌ప‌డేద‌ని సోనియా రాశారు. పాత్ ఫోటోల‌ను తేదీలుగా పేర్చేద‌న్నారు. కొన్ని సంద‌ర్భాల్లో త‌న చీర‌ల‌ను బ‌య‌ట‌కు తీసి, వాటిని ఓ ప‌ద్ధ‌తి ప్ర‌కారం అమ‌ర్చేద‌న్నారు. కొన్ని కొన్ని చీర‌లను ఇందిర మూట‌క‌ట్టి వాటికి ట్యాగ్‌లు పెట్టేద‌ని సోనియా త‌న బుక్‌లో రాశారు. ఒక్క‌సారి క‌ట్టిన చీర‌ల‌ను మ‌రో చోట పేర్చేద‌న్నారు. అయితే బంధువుల‌కు కొన్ని సంద‌ర్భాల్లో చీర‌ల‌ను ఇందిర పంపేద‌ని రాశారు. సోనియాకు చీర‌లు అంటే అమిత‌మైన ఇష్ట‌మ‌ని, త‌ల్లి చీర‌ల‌ను కూడా ఇందిర త‌న అల్మారాలో ఉంచుకున్న‌ట్లు సోనియా రాశారు. అయితే నాన‌మ్మ అయిన త‌ర్వాత ఇందిర‌లో ఆవేశం కాస్త నెమ్మ‌దించిన‌ట్లు సోనియా పేర్కొన్నారు. మ‌న‌వ‌ళ్లు పెద్ద‌ అయిన త‌ర్వాత ముందుగా ఇందిర మ‌న‌సును తెలుసుకునేందుకు పిల్ల‌ల్ని పంపేవాళ్ల‌మ‌ని, అయితే మ‌న‌వ‌ళ్లు రాగానే ఇందిర మ‌న‌సు వెన్న‌లా మారేద‌ని సోనియా రాశారు. పిల్ల‌లు న‌వ్వినా లేదా అమాయ‌కంగా ప్ర‌శ్న వేసినా.. ఇందిర క‌రిగిపోయేద‌న్నారు. ఆ స‌మ‌యంలో ఇందిర చాలా రిలాక్స్ అయ్యేద‌ని సోనియా త‌న బుక్‌లో తెలిపారు.