కళలు.. మన సంస్కృతికి ప్రతిబింబాలు. తెలుగు వారి జీవన విధానంలో భాగమై.. మరుగున పడిన ఎన్నో ప్రాచీన కళలను వెలుగులోకి తెస్తూ..వాటికి పూర్వ వైభవం కల్పించేందుకు భాషా సాంస్కృతిక శాఖ నడుంబిగించింది. ఇప్పటికే శాస్త్రీయ, జానపద, నృత్యం, సంగీతంలో సుశిక్షితులైన గురువులతో శిక్షణ ఇప్పిస్తున్నది. మరోవైపు యుద్ధ విద్యలైన కర్ర, కత్తి సాములోనూ యువతీ యువకులకు తర్ఫీదు ఇస్తున్నది. రవీంద్రభారతిలోని కృష్ణ సింధూరి సంకల్ప లలితా కళా నిల యం వెనుక భాగంలో 45 రోజుల వేసవి శిక్షణా శిబిరాన్ని ఏర్పాటు చేసింది. వస్తాద్ డాక్టర్ ఆకుల శ్రీధర్తో ట్రైనింగ్ ఇప్పిస్తున్నది.
చరిత్రలో కర్ర, కత్తిసాముకు ఎంతో ప్రత్యేకత ఉంది. ప్రతి క్రీడకు ఉన్నట్లే వీటికీ కొన్ని పద్ధతులున్నాయి. ఒక్కసారి గతంలోకి తొంగిచూస్తే.. రామాయణం, మహాభారతం నుంచే ఈ కర్ర, కత్తిసాములు ఉన్నాయి. రాణీ రుద్రమాదేవి కత్తి తిప్పడంలో మహా యోధురాలు. శ్రీకృష్ణ దేవరాయులు, రెడ్డి రాజుల కాలంలో ఈ కళలకు ఎంతో ప్రాచుర్యం ఉండేది. రానురాను ఈ ప్రాచీన కళ వ్యాయామ క్రీడగా మారింది. అయితే తెలంగాణ రాష్ట్ర ఏర్పాటు తర్వాత భాషా సాంస్కృతిక సంచాలకుడు మామిడి హరికృష్ణ కత్తి, కర్రసాములపై శిక్షణ శిబిరాలు ఏర్పాటు చేశారు. ఆసక్తి ఉన్న ప్రతిఒక్కరికీ శిక్షణ ఇప్పిస్తున్నారు. ఈ వ్యాయామ క్రీడలు నేర్చుకుంటే ఆత్మవిశ్వాసం పెరుగడం ఖాయం. అంతేకాకుండా గ్రహణ శక్తి, మనోధైర్యం, మానసిక ఉల్లాసం కలుగుతాయి.
అంతరించిపోతున్న కర్ర, కత్తిసాము లాంటి ప్రాచీన కళలను కాపాడుకోవాల్సిన అవసరం ఎంతైనా ఉంది. ఒకప్పుడు ఎంతో వెలుగు వెలిగిన యుద్ధ విద్యలను భాషా సాంస్కృతిక సంచాలకుడు మామిడి హరికృష్ణ బయటికి తీసుకు వచ్చి శిక్షణా తరగతులను నిర్వహించడం అభినందనీయం. ఇప్పటికే ఆన్లైన్లో రెండు వర్క్షాపులు, ఆఫ్లైన్లో మూడు శిబిరాలు నిర్వహించాం. కృష్ణ సింధూరి సంకల్ప లలితా కళానిలయంలో ఎండీ శ్రీనివాస్రెడ్డి సహకారంతో కూకట్పల్లిలో ఆన్లైన్ వర్క్షాపులు నిర్వహిస్తున్నాం. చల్లా శ్రీనివాస్, రమాదేవిల సహకారంతో కర్రసాము విద్యలో శిక్షణ ఇస్తున్నాం. -డాక్టర్ ఆకుల శ్రీధర్, కర్రసాము వస్తాదు