Harish Rawat | పీఏ ఇంట్లో న‌గ‌దు, న‌గ‌లు స్వాధీనం చేసుకున్న ఈడీ.. కీల‌క ప‌ద‌వుల‌కు ఉత్త‌రాఖండ్ మాజీ సీఎం రాజీనామా..!

Harish Rawat | ఉత్తరాఖండ్ మాజీ ముఖ్యమంత్రి (Uttarakhand Ex CM), కాంగ్రెస్ సీనియర్ నాయకుడు (Congress Senior Leader) హరీశ్ రావత్ (Harish Rawat) సంచలన నిర్ణయం తీసుకున్నారు. తన రెండు పదవులకు రాజీనామా చేస్తున్నట్లు ప్రకటించారు.

Harish Rawat : ఉత్తరాఖండ్ మాజీ ముఖ్యమంత్రి (Uttarakhand Ex CM), కాంగ్రెస్ సీనియర్ నాయకుడు (Congress Senior Leader) హరీశ్ రావత్ (Harish Rawat) సంచలన నిర్ణయం తీసుకున్నారు. తన రెండు పదవులకు రాజీనామా చేస్తున్నట్లు ప్రకటించారు. తన పీఏ చందన్ సింగ్ జీనా ఇంట్లో ఈడీ (Enforcement Directorate) సోదాలు నిర్వహించిన నేపథ్యంలో ఈ నిర్ణయం తీసుకున్నారు.

ఉత్తరాఖండ్ ప్రదేశ్ కాంగ్రెస్ కమిటీ కార్యవర్గం (PCC), కాంగ్రెస్ వర్కింగ్ కమిటీ (CWC) శాశ్వత ఆహ్వానితుడి పదవుల నుంచి రావ‌త్‌ వైదొలిగారు. ఎన్నికల వేళ.. తన వల్ల పార్టీకి ఇబ్బంది కలగకూడదనే ఈ నిర్ణయం తీసుకున్నట్లు రావత్ తెలిపారు. ఈడీ గురువారం దెహ్రాదూన్‌లోని పలు ప్రాంతాల్లో సోదాలు చేసింది. 2016లో ఉత్తరాఖండ్ సబార్డినేట్ సర్వీస్ సెలక్షన్ కమిషన్ నియామక పరీక్షలో ఓఎంఆర్ షీట్లను మార్చి అక్రమాలకు పాల్పడ్డారని జీనాపై నమోదైన కేసుకు సంబంధించి ఈ చర్యలు చేపట్టింది.

జీనా నివాసంలో రూ.32 లక్షల నగదు, సుమారు 200 గ్రాముల బంగారు నాణేలు, ఆభరణాలు, 12 ఖరీదైన గడియారాలు స్వాధీనం చేసుకున్నట్లు ఈడీ తెలిపింది. జీనా, ఆయన కుటుంబసభ్యుల బ్యాంకు ఖాతాల్లోని రూ.52.16 లక్షలను స్తంభింపజేసింది. అయితే జీనాపై వచ్చిన ఆరోపణలను తాను నమ్మడం లేదని, అతను బాగా కష్టపడి పనిచేసే వ్యక్తి అని రావత్ చెప్పారు. ఆధారాలు ఉంటే చర్యలు తీసుకోవాలని స్పష్టంచేశారు. గతంలో రావత్ ముఖ్యమంత్రిగా ఉన్న సమయంలో జీనా ఓఎస్డీగా పనిచేశారు. ఆ తర్వాత పీఏగా కొనసాగుతున్నారు.