కొత్త పద్ధతిలో జీఆర్‌ఈ

విదేశీ విద్యను అభ్యసించాలనుకునే విద్యార్థులు ఎక్కువగా రాసే పరీక్ష జీఆర్‌ఈ. ఏటా సుమారు లక్షమందికి పైగా రాసే ఈ పరీక్షలో కొన్ని ప్రధానమైన మార్పులను ఎడ్యుకేషనల్‌ టెస్టింగ్‌ సర్వీస్‌ (ఈటీఎస్‌) చేసింది.

• సెప్టెంబర్‌ 22 నుంచి అమల్లోకి

(ఎడ్యుకేషన్‌ డెస్క్‌) ;విదేశీ విద్యను అభ్యసించాలనుకునే విద్యార్థులు ఎక్కువగా రాసే పరీక్ష జీఆర్‌ఈ. ఏటా సుమారు లక్షమందికి పైగా రాసే ఈ పరీక్షలో కొన్ని ప్రధానమైన మార్పులను ఎడ్యుకేషనల్‌ టెస్టింగ్‌ సర్వీస్‌ (ఈటీఎస్‌) చేసింది. సెప్టెంబర్‌ 22 నుంచి అమల్లోకి వచ్చే ఈ మార్పుల గురించి సంక్షిప్తంగా..

గ్రాడ్యుయేట్‌ రికార్డ్‌ ఎగ్జామ్‌ (జీఆర్‌ఈ) పరీక్ష ప్రధానమైంది. దీన్ని ఈటీఎస్‌ నిర్వహిస్తుంది. ఇంజినీరింగ్‌, స్టెమ్‌, బిజినెస్‌ స్కూల్స్‌, లా వంటి కోర్సుల్లో ప్రవేశాల కోసం ఈ స్కోర్‌ను పరిగణనలోకి తీసుకుని మాస్టర్స్‌లో ప్రవేశాలు కల్పిస్తాయి.

• ఈ పరీక్ష కాలవ్యవధి 4 గంటలు ఉండేది. సెప్టెంబర్‌ 22 నుంచి దీన్ని 2 గంటలకు తగ్గించారు.
• పరీక్షలో ఇచ్చే అంశాల్లో (సబ్జెక్టుల్లో) మార్పులు ఏమీ చేయలేదు.
• పశ్నల సంఖ్య తగ్గింది. ముఖ్యంగా వెర్బల్‌, క్వాంట్‌ సెక్షన్‌లో ప్రశ్నల సంఖ్య తగ్గనున్నాయి.
• ఏడబ్ల్యూఏ (అనలిటికల్‌ రైటింగ్‌) సెక్షన్‌లో పాత పద్ధతిలో రెండు టాస్క్‌లను 60 నిమిషాల్లో పూర్తిచేయాల్సి ఉండేది. కొత్త పద్ధతిలో ఒకే టాస్క్‌ ఉంటుంది. దీన్ని 30 నిమిషాల వ్యవధిలో పూర్తి చేయాలి.
• కొత్త పద్ధతి వల్ల ఎక్కువ సేపు పరీక్ష రాయలేని వారు అంటే సుమారు నాలుగు గంటలు పరీక్ష రాయలేని వారికి ఇది ఒక వరం. అంతేకాకుండా పరీక్ష నిడివి, ప్రశ్నల సంఖ్య తగ్గడం వల్ల ఫలితాలను త్వరగా వెల్లడించే అవకాశం ఉందని అభ్యాస్‌ డైరెక్టర్‌ శిరీష అభిప్రాయపడ్డారు.
• అభ్యర్థులను కచ్చితంగా అంచనా వేస్తూనే పరీక్ష ప్రక్రియను సులభతరం చేయడం దీని ఉద్దేశం.
• పాత పద్ధతిలో సెక్షనల్‌ బ్రేక్‌ (పది నిమిషాల విరామం) ఉండేది. కొత్త పద్ధతిలో ఎలాంటి బ్రేక్‌లు ఉండవు.
• కొత్త పద్ధతిలో అన్‌స్కోర్డ్‌ సెక్షన్‌ను
  తొలగించారు.
• పాత, కొత్త పద్ధతిలో ఒక్కో ప్రశ్నకు అభ్యర్థికి ఇచ్చే సమయంలో ఎటువంటి మార్పులేదు.