మళ్లీ ఉద్యోగంలో చేరిన రిటైర్డ్‌ అధికారులకు కోడ్‌ వర్తింపు

అధికార దుర్వినియోగానికి కొందరు అధికారులు పాల్పడుతున్నారంటూ ఫిర్యాదులు వస్తున్న నేపథ్యంలో ఎన్నికల ప్రవర్తనా నియమావళి(ఎంసీసీ) కింద ప్రభుత్వ ఉద్యోగులకు వర్తించే ఆంక్షలు, నిషేధాలను పదవీ విరమణ చేసి తిరిగి ఉద్యోగంలో చేరిన అధికారులకు,

• రాష్ట్ర ప్రభుత్వాలకు ఎన్నికల సంఘం ఆదేశం

న్యూఢిల్లీ, నవంబర్‌ 10 : అధికార దుర్వినియోగానికి కొందరు అధికారులు పాల్పడుతున్నారంటూ ఫిర్యాదులు వస్తున్న నేపథ్యంలో ఎన్నికల ప్రవర్తనా నియమావళి(ఎంసీసీ) కింద ప్రభుత్వ ఉద్యోగులకు వర్తించే ఆంక్షలు, నిషేధాలను పదవీ విరమణ చేసి తిరిగి ఉద్యోగంలో చేరిన అధికారులకు, వ్యక్తులకు కూడా భారత ఎన్నికల సంఘం(ఈసీఐ) విస్తరించింది. వివిధ హోదాల్లో రాష్ట్ర ప్రభుత్వాలు నియమించిన రిటైర్డ్‌ ప్రభుత్వ ఉద్యోగులు ఎంసీసీ అమల్లో ఉన్న సమయంలో ఎన్నికల విధుల్లో ఉన్న అధికారులతో సమావేశాలు నిర్వహిస్తున్నారనే ఫిర్యాదులు గతంలో వచ్చాయని సీనియర్‌ ఉన్నతాధికారి ఒకరు తెలిపారు.

అటువంటి వ్యక్తులు రాజకీయ తటస్థతను పాటించాలని, ఎన్నికల ప్రచారాల్లో పాల్గొనకుండా లేదా ఓట్ల కోసం ప్రచారం చేయకుండా ఉండాలని ఈనెల 9న గోవా, మణిపూర్‌, పంజాబ్‌, ఉత్తర ప్రదేశ్‌, ఉత్తరాఖండ్‌ రాష్ర్టాల ప్రధాన కార్యదర్శులకు రాసిన లేఖలో ఈసీఐ పేర్కొంది. ఎన్నికలు ప్రకటించిన నియోజకవర్గం లేదా జిల్లాకు చెందిన ఎన్నికల అధికారులను అధికారిక చర్చల కోసం లేదా సమావేశాల కోసం పదవీ విరమణ చేసి తిరిగి విధుల్లో చేరిన అధికారులు పిలవకూడదని ఈసీఐ ఆదేశించింది. ఎన్నికల విధుల్లో ఉన్న అధికారులతో వీడియో కాన్ఫరెన్సులు లేదా సమావేశాలు నిర్వహించరాదని తెలిపింది. ఈ ఆదేశాలను ఉల్లంఘించిన పక్షంలో తీవ్రంగా పరిగణిస్తామని ఈసీఐ హెచ్చరించింది. వీటిని కచ్చితంగా పాటించేలా చూడాలని రాష్ర్టాలను ఆదేశించింది.